नेपाली हास्यव्यङ्ग्य अनलाइन पत्रिका

नगिता लेप्चा राई :

छोराले शहरमा घर त बनाएछ
मार्बलै मार्बलको महल बनाएछ
कुकुरको समेत कोठा बनाएछ
बुवा आमाको लागि भने
सानो कोठा बनाउन भुसुक्कै बिर्सिएछ ।

श्रीमतीसँग क्याण्डल लाइट डिनर गर्दागर्दै
आमाले बनाएको खानाको स्वाद नै बिर्सिएछ
अफिसको चापाचाप काममा पनि कुकुरको मासु ल्याएछ
बुवा आमालाई दूध चाहिन्छ भनेर चाहिँ भुसुक्कै बिर्सिएछ ।

ठन्डा महिनामा जाडोको लुगा सबैलाई ल्याएछ
कुकुर पनि नयाँ लुगा पाएर गमक्कै भै बसेको छ
बुवा आमालाई बुढेसकालको कमजोरी ढाक्ने
कम्बल चाहिन्छ भनेर चाहिँ भुसुक्कै बिर्सिएछ ।

बुहारीलाई मज्जाको रानिहार उपहारमा दिएको छ
छोराको उपहारले मेरी बुहारी धपक्कै बलेकी छ
सानो हुँदा आमाले आफ्नो मङ्गलसूत्र बेचेर
स्कुल पढाएको उसले भुसुक्कै बिर्सिएछ ।

बुवा चै भक्कानिन्छ म भन्छु
के गर्नु त्यस्को बिर्सिने बानी छ
आज पनि श्रीमतिलाई साडी कुकुरलाई मासु बोर्सिएनछ
तर बुवाको सुगरको औषधि चाहिँ भुसुक्कै बिर्सिएछ ।

श्रीमतीको जन्मदिनमा चौरासी व्यञ्जन अर्डर गरेछ
बुवा आमालाई खाना अर्डर गर्नै बिर्सिएछ
जन्मदिनको केक काटेर सबैलाई खुवाएछ
बुवा आमालाई ख्वाउन चाहिँ बिर्सिएछ
सानो हुँदा उसलाई केक खुवाउन
म र उसको बुवाले छिमेकीको खेतमा
गोरु जोतेको पनि भुसुक्कै बिर्सिएछ
उसको बिर्सिने बानी अझै गएको रहेन छ ।

०००

खोलाचन्द फाप्री, जलपाइगुड़ी (भारत)