नेपाली हास्यव्यङ्ग्य अनलाइन पत्रिका

अर्जुन पराजुली :

मेरो कसैसँग कुनै लेनादेना छैन
कसैकोमा आताजाता छैन !
तक्मा पुरस्कार र नियुक्तिसँग
मेरो कुनै नाता छैन ।
महिनैपिच्छे खातामा पैसा हालिदिने
मसँग कुनै दाता छैन !
भिजेरै बिताएँ जिन्दगी झरीमा मैले
मसँग कुनै दलको छाता छैन !
घर छ, खुला छ
गोप्य चोटो-कोठो छैन
भित्तो छ, रितो छ
टाँस्नलाई कसैको फोटो छैन !
मसँग त-
एउटा सानु कलम छ
एक पानु धर्के कापी छ
र,
एक मुठीजति डिको नभएका अक्षर छन् !!

०००
सितलपाखो, कीर्तिपुर