नेपाली हास्यव्यङ्ग्य अनलाइन पत्रिका

रूपक अलङ्कार :

व्यापार गर्नेछु भँडासको म
उद्गोष गर्नेछु विकासको म
बनी सुनामी जब आउने छु
यो देश भूस्वर्ग बनाउने छु ।

लाछीहरू बाघ भनुन् मलाई
नाचुन् खुसीले थपडी बजाई
बोल्ने सबै ओठ सिलाउने छु
यो देश भूस्वर्ग बनाउने छु ।

फूपू र भान्जा भतिजा र मामा
पुग्छन् जहाँ यी फरिया र जामा
सम्झी सबैमा गुन लाउनेछु ।
यो देश भूस्वर्ग बनाउनेछु ।

झोलेहरूको हुल होस् अगाडि
भेडाहरूको भिड होस् पछाडि
अरू सबै मूर्ख बनाउनेछु ।
यो देश भूस्वर्ग बनाउनेछु ।

बजार थाप्नेछु म बेच्न भोक
मेरै प्रशंसातिर हुन्छ लोक
चरेसको लड्डु पकाउनेछु
यो देश भूस्वर्ग बनाउनेछु ।

हिमाल चाटेर नदी पिएर
ढुङ्गा गिटी काठ सबै निलेर
अगस्तिको नाम मिटाउनेछु
यो देश भूस्वर्ग बनाउनेछु ।

०००
काठमाडाैं