नेपाली हास्यव्यङ्ग्य अनलाइन पत्रिका

सुरेन्द्र लिम्बू परदेशी :

कहिले माथि डाँडैडाँडा
पकन्दी खेल्दै हिँड्ने मान्छे
कहिले खोलाको किनारैकिनार
सुसेली मार्दै हिँड्ने मान्छे
आज तिमी सामु उभिएको छ
आफ्नै अस्तित्वको प्रश्न सोध्न
के तिमी उसका प्रश्नहरूलाई
सम्बोधन गर्न सक्छौ ?

ढलेको धरहराजस्तै देशको स्वाभिमान
ऊ स्वतन्त्र उभ्याउन चाहन्छ
रङ्गेहात समातिएको मन्त्रीको इज्ज्जतमा
निरोध फुटेजस्तै अन्योल छाएको छ
पर्दा झरेजस्तै गरिबीको रङ्गमञ्चमा
साथ छुटेजस्तै वितृष्णा बढेको छ
यस्तै अन्योलको घडीभित्र
उसले आफ्नो हैसियत सोध्यो भने
के तिमी उसका प्रश्नहरूलाई
सम्बोधन गर्न सक्छौ ?

किन बिलाउँदैछन् बहुजात बहुभाषा
यो एकात्मक अतिक्रमणको घोलमा ?
किन घन्किँदैन हाक्पारे ख्याली र सेलो
यो बहुसाँस्कृतिक समाजको आँगनमा ?
किन पाउँदैन दशैँको उचाइ अरु चाडले
यो बहुधार्मिक मुलुकको फूलबारीमा ?
ऊ सत्तासीन सरकारलाई सोध्न चाहन्छ
के तिमी उसका प्रश्नहरूलाई
सम्बोधन गर्न सक्छौ ?

मकैको सेपले किन ढलिरहेछ भटमास ?
जसरी किनारीकृतहरू ढलिरहेका छन्
स्वार्थको आगोमा किन बलिरहेको छ सत्ता ?
हामी दिउँसै राँको बालेर घाम खोजिरहेका छौँ
दिनानुदिन किन बढिरहेको छ वैदेशिक हस्तक्षेप ?
र बनिरहेको छ यो देश कसैको उपनिवेश
ऊ आफ्नो देशलाई सोध्न चाहन्छ
के तिमी उसका प्रश्नहरूलाई
सम्बोधन गर्न सक्छौ ?

०००
२५ असोज २०७९
११ अक्टोबर २०२२
लखनऊ, भारत ।