नेपाली हास्यव्यङ्ग्य अनलाइन पत्रिका

विष्णु न्याैपाने :

अत्याचार भयो नाङ्गो नाचका रमिते भयौं
छद्मभेषी हुँदा हामी अरूकै दास रैरह्यौँ
खेल्दछन् शक्तिका केन्द्र रणमैदान देश भो
खरानीभित्र छौँ हामी देश पत्ताल भासियो ।

ठान्छ यो बाबुको बिर्ता छिमेकी दक्षिणी सधैं
नसेके उसको रोटी थाल्छ ढाल्न जरासँगै
बोल्दैन उत्तरी लाटो छैन बाटो हिमाल छन्
घुसेर पश्चिमी बाठो बाल्छ आगो धुराल्छ झन् ।

एन्जिओ खेल्दछन् खेल रङ्गशाला हजार छन्
खेलाडी लाख छन् हाम्रा नाच्न मेला बजार छन्
राजाका नामले नाच्छन् पार्टीका नामले कुनै
युवा, स्वतन्त्र वा जेन्जी जातिका नामले कुनै ।

हाने संस्कारमा हाम्रो मासे संस्कृतिका जरा
खुट्टा शिर छिनाएर भन्छन् आफैँ कठैबरा
इतिहास डढाएर खरानी ताप्तछन् यिनै
भाइभाइ लडाएर सिमाना तास्तछन् यिनै ।

शिक्षामा सिर्कना हाने जन्माए लठुवा युवा
बनाए भतुवा आफ्ना खनाए उनकै कुवा
मख्ख छन् भतुवा आज देश आगो लगाउँछन्
आमा निर्बस्त्र पारेर आफैं ताली बजाउँछन् ।

अत्याचार भयो नाङ्गो नाचका रमिते भयौं
छद्मभेषी हुँदा हामी अरूकै दास रैरह्यौँ
खेल्दछन् शक्तिका केन्द्र रणमैदान देश भो
खरानीभित्र छौँ हामी देश पत्ताल भासियो ।

०००
झापा