नेपाली हास्यव्यङ्ग्य अनलाइन पत्रिका

विष्णु न्यौपाने :

बढेको छ माहोल ह्वात्तै चुनावी ।
कसैमा चलेको छ सुर्ता सुनामी ।
इराधा कसैको छ सङ्ग्राम जेता ।
गरी हिँड्नु अग्रीम वाणी विजेता ॥१॥

चुनावी बहाना कसैको कमाइ ।
कसैको चलेको छ भट्टी रमाई ॥
कुनै हिँड्छ बाटो छली पाखपाखै ।
कुनै रातमा हिँड्छ बाँडेर लाखै ॥२॥

गफाडी कुरामा चिया तान्छ कोही ।
सबै हाँक्छ आकाश पाताल कोही ॥
तिमी दम्भ गर्छौ तिमी रङ्ग भर्छौ ।
गफाडी विकासे कुरा भङ्ग गर्छौ ॥३॥

तिमी हौ पुराना छली गर्न आँटी ।
जहाँ जे मिल्यो सो कुरा हुन्छ ढाँटी ॥
अचम्मै भलाद्मी बनी हात जोड्दै ।
लिई भोट वाचा गयौ मस्त तोड्दै ॥४॥

जनामा उही बन्छ अत्यन्त खासी ।
लिई भोट सम्झन्छ जना एक दासी ॥
यता ठालु बन्दै उरालिन्छ भाषा ।
उता जाल बुन्दै पसारिन्छ पासा ॥५॥

जहाँबोल्न पुग्छौ उहीँ मस्त ढाँट्ने ॥
अरूका कुरा मात्र निर्धक्क काट्ने ॥
कुनै कार्य कर्ता कहाँ हुन्छ भेटी ।
दिलो ज्यान दिन्छौ टकारेर भेटी ॥६॥

नचाहिन्छ शिक्षा न केही समर्थ ।
बुझाएर जग्गा गरी हिँड्नु खर्च ॥
बढेको छ उत्साह प्रचारी सभामा ।
जहाँ हुन्छ उन्माद त्यहीँ गर्नु धामा ॥७॥

नबन्ने कुनै छैन सादृश्य मूर्त ।
नचिन्ने कुनै छैन पाखण्ड धूर्त ॥
विकासे कुरा मात्र गर्छौ रबाफ ।
म गर्नेछु भन्दै झुटो हुन्छ बात ॥८॥

दुरुस्तै बनी रूप फेर्छौ असत्ती ।
नबाँढे हुनेथ्यो दिवा स्वप्न कत्ति ॥
कहीँ भावनामा छँदै छैन धर्म ।
कहाँ के गर्‍यौ खै तिमीले सुकर्म ??९??

०००
धादिङ