नेपाली हास्यव्यङ्ग्य अनलाइन पत्रिका

जनार्दन अधिकारी धड्कन

अग्ला सिमलका
रूखहरूमा
कतै
जङ्गलका अग्ला
अन्य रूखहरूमा
बासस्थान बनाएर
बस्ने गिध्द
सिनो नपाएर
झोक्राई रहेछन्
सबै लोप हुने हो कि भन्ने त्रास
र डर छ

यता सहरको
घना बस्तीमा बस्ने
बुढा गिध्दहरू
घर
र दरबार जलेपछि
खान न खुट्न भई
बचेराहरूलाई नै
ठुग्न थालेका छन्
यिनीहरूलाई
मात्र आफू बाँच्नु छ
एक दिन
मात्र भए पनि
आयु लम्याउनु छ
अरूले दिएको चारामा
विश्वास छैन
सम्मानजनक रूपमा
गुँड कुरेर बस्न चाहन्नन्
जिम्मेवारी दिन सक्दैनन्
रुख नै मेरो
घर हो भन्दै
आफ्नै बचेरालाई ठुँगेर
रुखबाट झार्न खोज्छन्
बुढा गिध्दहरू!

आस्थाको पिरामिड भत्काएर
चाहनाको मन्दिरमा
पूजा गर्दै
सजिलो गरी
सिनो पाउन
अझै कामना गर्छन्
सङ्गठित हुल बाँधेर
अझै उड्न सक्ने
घमण्डमा सिँह
बाघ
हुँडार,
ब्वाँसा
र स्यालहरूलाई
प्रतिस्पर्धी नै मान्दैनन्
कौवाहरूलाई पनि
मुखमात्रै हो भन्छन्
समय सबैका लागि
बराबर छ
शासनमा एकल
समय बिताएर
वर्तमानलाई
पद
र गुटसँगै राखेर
सधैँ सिनो जम्मा गर्न खोजिरहन्छन्
बुढा गिध्दहरू !!

०००
चन्द्रागिरी, काठमाडाैं