नेपाली हास्यव्यङ्ग्य अनलाइन पत्रिका

मनोनित गरे नि आउने यिनै हुन्
भोटै खसाले नि पाउने यिनै हुन्
यिनै थिए, यिनै छन्, रहने यिनै हुन्
तपाइँको त्यो हालत बनाउने यिनै हुन् ।

पञ्चायत नढल्दा जोगाउने यिनै हुन्
त्यो ढाली नयाँ यो लेराउने यिनै हुन्
भनी क्रान्ति–क्रान्ति, बिथोलेर शान्ति
तपाइँका ती कष्ट बढाउने यिनै हुन् ।

आधिकार माग, लोभ्याउने यिनै हुन्
विषालु मीठा भ्रम घोकाउने यिनै हुन्
सहिद सङ्ख्या धेरै बढाएर देशमा
युवा शक्ति परदेश लखेट्ने यिनै हुन् ।

नेपाली नेपाली फुटाउने यिनै हुन्
यो देशको ढुकुटी रित्याउने यिनै हुन्
स्कुल उद्योग गरी बाटो बन्द
यो देशमा गरिबी बढाउने यिनै हुन् ।

अझै आश लाग्छ ? निराशा यिनै हुन्
बिदेशी प्रभुका ठूला दास यिनै हुन्
सधैं उनले जित्ने सधैं देशले हार्ने
तपाइँलाई त्यो खेल खेलाउने यिनै हुन् ।

तपाईंलाई ढाँट्ने छकाउने यिनै हुन्
पछौटे बनाउन फकाउने यिनै हुन्
अनेक जालझेल र प्रपञ्च रचेर
यो देशको यो हालत बनाउने यिनै हुन् ।

संविधान लेराउने, नमान्ने यिनै हुन्
सरम लाज सप्पै पचाउने यिनै हुन्
ल जानुस् चढाउनोस् अबिर भेटी माला
तपाईंका साढे सात दशा खास यिनै हुन् ।
बत्तिसपुतली, काठमाडौं