प्रकाशमणि दहालत्यो देश कहाँ छ ?
१.हिउँको टोपी बादलु घुम्टो ओढेर शिरमा
सगरबाट सागर हेर्ने त्यो देश कहाँ छ ?
खेत र बारी छोडेर बाँझो विदेश भासिने
सन्तान बेची गुजारा गर्ने चलन जहाँ छ ।
२.हिमाल पहाड र उपत्यका मैदान नदी ताल
सृष्टिका यावत् अङ्गले युक्त त्यो देश कहाँ छ ?
आपसमा नै हानाहान गरी रगत बगाई
आफन्तको नै भागाभाग पार्ने आदत जहाँ छ ।
३.अखण्ड राष्ट्र निर्माण गर्ने पृथिवि जन्माउने
शान्तिका दूत बुद्धको धर्ती त्यो देश कहाँ छ ?
सोखका लागि जुधेर साँढे बाछाको मिचाई
पारेर सदा दाउपेच खेल्ने दुुर्बुद्धि जहाँ छ ।
४.पौरखी तथा बहादुर भनी विश्वले चिनेको
सहिष्णु जाति नेपाली बस्ने त्यो देश कहाँ छ ?
गुराँस फुलोस् मुनाल डुलोस् मत्लब नराख्ने
शक्ति र धन सर्वस्व ठान्ने दुर्भाव जहाँ छ ।
५. स्वतन्त्र, मुक्त जीवन निम्ति लडाइँ नछोड्ने
सङ्घर्षशील जातिको हाम्रो नेपाल कहाँ छ ?
वर्ष त के भो जुधेरै युगौँ बिताइरहने
छातीमा पत्थर जमेको निर्मम नेतृत्व जहाँ छ ।
जोरपाटी, काठमाडौँ
Subscribe
Login
0 Comments
Oldest
