नेपाली हास्यव्यङ्ग्य अनलाइन पत्रिका

(छन्द- शिखरिणी)

सुशिल् बाका दारी पनि अति भुसे स्याल सरिका
प्रधान्मन्त्री भाका तर पतनको रैछ तरिका
नबन्ने भो फोक्सो न त असल ज्रि्रो बनिदियो
नभो संविधानै न त वदन चाँडो ढलिदियो ।

(छन्द- पञ्चचामर)
प्रचण्ड चण्ड साधु हुन् कुबुद्धि मात्र चुन्दछन्
अखण्ड जात जातिमा प्रहार सूत्र बुन्दछन्
स्वदेश रक्तकुण्डमा डुबाइ दुष्ट नाच्तछन्
सबै लुटेर देश चैं महल् चढेर हाँस्तछन् ।

दरीद्रता छ देहमा कलङ्क र्छछ देशमा
थुरेर तोप स्नेहमा ऊ बुद्ध खोज्छ प्रेतमा
प्रचण्ड चण्डमुण्ड हुन् कि नाटकीय पात्र हुन्
कि लाशमाथि नाचने कुछेद सिद्ध जात हुन् !

(छन्द- अनुष्टुप)
बाबुराम् ज्ञानका दैंत्य साँच्चै शैतान हौ तिमी
उचाली जातको डोको युद्ध खिच्ने पुरेत् तिमी
मासेर जनता सारा ख्याँस्छौ के नर्कलोकमा
गयो पुच्छरमै तिम्रो पढेको भारू नोटमा ।

(छन्द- मन्दाक्रान्ता)
टट्टी भन्दा अझ दुषित छन् देशका पञ्च घाँडा
भट्टी भित्रै अतिव थुतुनो गाड्दछन् राष्ट्र साँडा
रून्छन् युवा दुख विरहमा खाडीमा सुँक्सुकाई
हाँस्छन् नेता महलहरूमा साडीमा लुट्पुर्टाई ।

(छन्द- शार्दुलविक्रीडित)
चन्द्रेराम र देउवा कलहका काला लँगौटी गुथी
भुत्भूताइ छ छुद्रता मनमनै क्यै छैन यिन्को मति
गच्छेदार उपेन्द्र केन्द्र कहिँका हुक्के र चम्चेहरू
खाल्डोमा सब हाल्नु पुर्नु बरू ठिक् यी राष्ट्रघातीहरू

देशै स्वात्त निलेर सिक्किम भयो नेपालको के गति
केपी माधव झल्लु उल्लु मनमा उस्तै छ कालै मति
छातीमा मुटु छैन त्यो हृदयमा खै देशको उन्नति
कालो स्वार्थ छ डस्नु निल्नु जनता यो राष्ट्रको सम्पत्ति ।

(छन्द- तोटक)
जनता भ्रमका रमिते बनिए
जति ताली बजे उतिरै खनिए
कति भात बिके कति रात बिके
अति भो अब ता सब जात बिके ।

(छन्द- श्रग्विणी)
देशका सत्रु हौ देश रित्याउने
हौ तिमी राक्षसी दुष्ट भित्र्याउने
कालका छालमा मुष्ट जान्छौ भने
बाल्छु मै श्राद्धको दीप मान्छौ भने ।

झापा