एक भोट हुँ म

युग परिवर्तन गर्छु भन्ने
झुठा नारा र आश्वासनबाट
आजीत भइसकेको
एक साधारण मान्छे म
मेरा न्युनतम आकाङ्क्षामाथि
तुषारापात नगर
मेरो सहनशीलताको कोशी दुख्यो भने
कुनै पनि बेला
विष्फोट हुनसक्छु म ।
सन्तानको एक पेटको लिप्सा बोकी
स्वदेशको बेथिति र बेरोजगारीबाट
आक्रान्त भई
सातसमुन्द्रर पारिका वस्तीहरूमा
काम खोज्दै भोकैप्यासै भौंतारी हिँडेको
एक स्वाभिमानी नेपाली म
मसँग धेरै देशप्रेमको ठट्टा नगर
म भित्रको अशान्त च्छो रोल्पा फुट्यो भने
कुनै पनि बेला
बिध्वंश मच्चाउन सक्छु म ।
तिम्रो झुठो किरियामा झोक्राइरहेका
रोल्पाका सतिसाललाई
दिनरात नजिकबाट नियालेको
द्वन्द्वपीडित इन्द्रेणी म
मेरा लुछिएका खुशी अनि
मैले बोकिहिँडेका समयका घाउहरू
देखेर पनि अनदेखा नगर
मैले भोगेका कठोर छट्पटीहरू
बिद्रोहको धरातलमा उत्रियो भने
कुनै पनि बेला
राँको भई दन्किन सक्छु म ।
आलिशान महलभित्र बसी
हुँकार गर्ने छिप्पिएका जुँगाहरू हो !
महँगीको महामारीमा पिल्सिएर
धारिलो भइसकेको
एक निरिह मान्छे म
मेरो भोको पेटको धेरै
उपहास नगर
भोका तनहरू एकजुट भई
आन्दोलित भयौं भने
कुनै पनि बेला
तिम्रो शिशमहल चक्नाचुर पार्नसक्छु म ।
सत्ताकृडामा लिप्त धूर्त स्यालहरू हो !
भ्रष्टाचारले अजीर्ण काला नागहरू हो !
राजनैतिक तिकडममा चेप्टिएर
तीखो भइसकेको भाला समान
केवल एक हतियार म
मेरा आधारभूत अधिकारमाथि
हस्तक्षेप नगर
मेरो माटोको सुगन्धमाथि
धावा बोल्यौ भने
कुनै पनि बेला
सिंहदरबारलाई समेत
मेरो पाइतालासामु
नतमस्तक पार्नसक्छु म,
मात्र एक भोट हुँ म
फगत एक भोट हुँ म ।