नेपाली हास्यव्यङ्ग्य अनलाइन पत्रिका

दुखमा पिएँ सुखमा पनि पिएँ
आज चाडवाड र छुट्टी हो भन्दै पिएँ
पिउनकै लागि भनेर
केही न केही बहाना बनाएँ
कहिले आफूमाथिको ज्यादती भुल्नलाई पिएँ
कहिले देशमाथिको अत्याचार बिर्सन पिएँ
यी सबै सोचेको मात्र के थिएँ नशा नै हरायो
केही भुल्नलाई पिएको त सबै घाउ ताजा पो गरायो
कहिले पिउनेलाई नै खुसी पार्न पिएँ
कहिले ठुला–बडाको पार्टीमा ग्लास ठोक्न पिएँ
सोध्नेहरूलाई यस्तै स्पष्टीकरण दिएँ
पिउनको लागि अनेक बहानाबाजी गर्दै पिएँ
कहिले लुकेर पिएँ त कहिले खुलेरै पिएँ
यसरी नै पिएँ अनि पिउँदै गएँ
तर जति पिए पनि म बर्तमानमै थिएँ
नपिउनेले भन्दा पनि धेरै होस सम्हालेँ
कहिले हाँस्दै पिएँ त कहिले रुँदै पनि पिएँ
दुख र कष्टहरूसँग यसरी नै जिएँ
मन केही हलुका होला कि भनेर
रिसाउनु भन्दा त पिउनुनै निको ठानेर
कहिले लेख्नलाई पिएँ त
कहिले देख्नलाई पिएँ
नदेख्ने कुरा देख्नुपर्ला भन्दै
मैले आँखा छोपेर पिएँ ।

हाल– जर्मन