नेपाली हास्यव्यङ्ग्य अनलाइन पत्रिका

यसरी हावाझैं दगुरेर
यसरी उफ्रेर यसरी पसिना निकालेर
के पाउँछ यो खेलाडी समयले ?
हल्ट !
अब म समयलाई थामिन आदेश दिन्छु ।
बिफल भएको छ
समयसँगको अन्तिम वार्ता ।
समय यसरी नै मनमौजी उडिरहन चाहन्छ
र म बाँदरको सानो बच्चाले
आमाको पुच्छर तानेझैं
रोकिराख्न खोज्छु धावक समयलाई–
अर्को एक सय वर्ष !
हिमालय शृङ्खलादेखि हिन्द महासागरसम्म
गङ्गादेखि इन्दुु नदी उपत्यकासम्म
यसभन्दा पनि टाढा टाढासम्म
म त्रासदीको सतबिज छरिरहन चाहन्छु ।
यसरी रकेटझैं उडेर
कहाँ पुग्छ यो हाउडे समय ?
समयलाई यत्ति पनि थाहा छैन
कि म मुक्तिका नयाँ रसायनहरू बारे
भूमिगत बसेर सोचिरहेछु ।
हल्ट !
म नाकको आकृति अनुसार
राज्यको निर्माणबारे सोच्दै उत्तेजित भइरहेछु
हल्ट !
म छालाको रङ अनुसार
क्रान्तिको भविष्यबारे सोच्दै रोमाञ्चित भैरहेछु
हल्ट !
म जातको दशगजामा उभिएर
नयाँ विश्वको कल्पनाले विरेचित भएको छु
हल्ट !
म धर्मको एक चिलिम कश तानेर
सडकको बिचमा मस्त सुतिरहेछु ।
यो उदार तालीबानी क्षेत्रमा
कसले पढाउने जघन्य अपराध गर्यो
बतुरी मलालालाई ?
को हो त्यो साहिर लुधियानवी
जो ताजमहललाई
गरिबीको मजाक सम्झन्छ ?
कसले नारा लगायो
बन्दुक बेच्ने साहु–अमेरिका बिरुद्ध ?
कसले बिरोध गर्यो
कुकुरसँग बिहे गर्ने मङ्गली मुण्डियाको ?
बुढा आमाबाको ‘तलाइकुथल’ महान मुक्ति हो
आमिर खान किन बढी बकबक गर्छ ?
हजारौं पशुहरूको गर्धन छिनाल्ने
गढीमाई मेला हाम्रो सान हो,
यस बिरुद्ध मानिसहरूको जुलुस किन निस्कन्छ ?
म मनुस्मृतिको आजीवन बिरोधी
मेरो शैलीमा त्यसकै नयाँ सस्करण लेखिरहेछु
म इतिहासको अँध्यारो गल्लीबाट निस्किएर
फोहोर गल्लीतिर हिँडिरहेछु
म विभेदको पर्खाल भत्काउँदा भत्काउँदै
आफैं एउटा पर्खाल भएको छु ।
हल्ट !
बेअर्थ नदीझैं बगिरहन्छ यो चकचके समय ।
आऊ मेरा प्रियजनहरू
मैले प्रयोगशालामा बनाएको आतङ्कको झोल भरेर
एकेक सिरिंज पाखुरामा उनौँ
र यो चिसो हिमालय पर्वतमा
सुतौँ सम्पूर्ण वस्त्र उतारेर ।
कट्टु काटेर झण्डा बनाऔँ
अण्डकोश र मृगौला निकालेर बम बनाऔँ
पेटीकोट च्यातेर पुतला बनाऔँ
आऊ
अब एउटा नग्न युद्धको तयारी गरौँ ।
यो सुनौलो भूगोलमा जुनसुकै बेला
छिर्न सक्छ– दुस्मन समय,
निर्माणको ढोकामा गजबार लगाऔँ ।
सिर्जनाको मधुसमा ताल्चा मारौँ ।
उन्नतिको झ्यालमा चुकुल ठोकौँ ।
समयको जहाज रनवेमा कुदेर
लामो उडान लिन सक्छ कुनै पनि बेला
होसियार बनौँ
र त्यसमा मिसाइल दागौँ ।
सक्छौ भने आऊ
कुनै देवदुत आएको हौवा फिँजाएर
सामूहिक आत्महत्या नै गरौँ ।
हल्ट !
अब म समयलाई थामिन आदेश दिन्छु ।
नवलपरासी