नेपाली हास्यव्यङ्ग्य अनलाइन पत्रिका

अचेलभरि प्रायजसो इमानदारकै धज्जी उड्छ
मस्तीमा छन् दुराचारी, सदाचारकै धज्जी उड्छ ।

गुरुजन र मान्यजनको, हराई सक्यो मर्यादा नै
मर्दापर्दा साथ दिने, मदतगारकै धज्जी उड्छ ।

बेइमानी मुस्कुराउँछ, गगनचुम्बी घरमा बस्दै
लप्पन छप्पन नजान्नेको, घरबारकै धज्जी उड्छ ।

जहाँ खायो त्यहीँ चुठ्ने, गर्न थाले धेरै मान्छे
जताततै कृतघ्न छन्, उपकारकै धज्जी उड्छ ।

तिरष्कृत छन् बाबुआमा, मायाँ, दया छैन कतै
सोचाइ ज्यादै निष्ठुरी भो,पालनहारकै धज्जी उड्छ ।

निष्ठा, भक्ति, आदर्शता, कुना पसी रुन्छन् सधैं
राम, कृष्ण, गौतम बुद्ध, अवतारकै धज्जी उड्छ ।

छट्ट्याइँ, फट्याइँ, मारामारी, गर्न सक्ने हुन्छ ठूलो
सरल, शिष्ट ‘कोमल’ तथा, मिलनसारकै धज्जी उड्छ ।
पुरानो नैकाप, काठमाडौं
हाल– न्युयोर्क, अमेरिका