नेपाली हास्यव्यङ्ग्य अनलाइन पत्रिका

ठुटे कलम बुटे कलम, कलम नानाथरी
इसारामा नाच्छ कैले कलम कठैबरी
जस्को सिता खान्छ, उस्कै गीत पनि गाउँछ
पाजी कलम ख्वामितका पाउ मुसार्न धाउँछ ।

जदौ भन्छ कर जोरी प्रशंसाको गजुर
निहुरिन्छ, ढोग गर्छ, प्रणाम अनि हजुर
नीति हैन नेतालाई गर्छ सँधै सलाम
लाज छैन लबस्तरो औशरवादी कलम ।

सत्ता जस्तै मीठो मान्छ भत्ता लुँड्याउँछ
धुत्र्याइँकै भर परी पेट ठड्याउँछ
जात छोड्यो धर्म छोड्यो विवेकलाई बाँध्यो
कविता हो भन्दै हेर चाकरी पो छाद्यो ।

तिललाई पहाड पनि बनाइ हिंड्छ कलम
खुराफात ओकलेर बबाल गर्छ कलम
चोरी अनि चकारीमा लर्खराउँछ कलम
कमिशन्को चक्करमा चक्कराउँछ कलम ।

देशघाती सम्झौतामा खर्च गर्छ मसी
घातकलाई जातक पार्छ कलम धसीधसी
सधैंजसो गाली लेखि ताली समेत पाउँछ
सालीलाई जागिर ख्वाउन तोक पनि लाउँछ ।

फुर्ति लाउँछ, घुर्की लेख्छ धम्की पनि दिन्छ
ठूलो बडो फलानाको म दाइने हात भन्छ
शौम्यताको प्रतीक यो किन भयो दुच्छर
कलम पनि हुँदोरेछ लिन्ठिङ् लिन्ठिङ् पुच्छर ।
कलङ्की, काठमाडौं