नेपाली हास्यव्यङ्ग्य अनलाइन पत्रिका

भलो
सङ्घर्षपछि प्रजातन्त्र आए पनि
देश प्रयोगै प्रयोगको थलो भो ।
निर्धाहरूलाई शक्तिशालीहरूले दप्काए छन्–
चौतर्फी रुपमा यहाँ हुनेखानेकै भलो भो ।

चिट
लुज र टाइट रोजाउँनुस्
ठिटाठिटीहरूलाई टाइट नै फिट हुन्छ ।
अघिपघि घोकाएर के भो ?
परीक्षामा तिनैका गोजीमा चिट हुन्छ ।

फलिफाप
मिहेनतीलाई सधैँ यहाँ घोक्रेठ्याक
अल्छीलाई पिठ्यूँमा लाग्छ धाप ।
कलीयुग लागेर हो क्यार ! जमानै उल्टो छ–
जसको पाप उसैको भै’राछ फलिफाप ।

प्रजातन्त्र
तिमी भालुलाई पुराण नसुनाऊ
त्यो त धर्मको नाउँमा छल हो ।
प्रकारान्तरले हाम्रो प्रजातन्त्र
‘बाँदरको हातको नरिवल’ हो ।

विश्वास
आस्था छ भने नाम पनि राम हो,
व्यवहार उल्टो भएपछि रामै हराम हो ।
‘लाटो लड्छ एक बल्ड्याङ्, बाठो तीन बल्ड्याङ्’
विश्वास टुटेपछि राम, हराम सबै मस्ताराम हो ।
मन्थली रोछाप