नेपाली हास्यव्यङ्ग्य अनलाइन पत्रिका

झुशील’दा आजभोलि अलि बढी निहुरिन थालेको किन ?
त्यत्रो दाह्रीको भारि यित्रो बुढो गर्दनले कसरी थामोस् त ?
हो र ? हो त नि !

केपोलीको बोलीमा उखानका गोली थोरै हुन्छन आज भोलि, किन ?
ऊ खान छोडेर अब त्यो खाने बेलामा उखानैतिर लागिरहुन् त !
हो र ? हो त नि !

उदण्डको कुम आजभोलि बेलाबेला उति उचालिँदैन, किन ?
त्यत्रो गरम कोटको त्यत्रो भारी बगली झुन्डिएपछि कुम कसरी उचालियोस् त ?
हो र ? हो त नि !

बन्दर नाइकेको श्वर आजभोलि झनझन बस्दै जान थालेको किन ?
उठ्यो कि हारी हालिन्छ भन्ने कुरा कसरी बिसिर्युन् त ?
हो र ? हो त नि !

मातम नेपालले च्याँट्ठिन कम गरेका छन्, किन ?
मातम नेपाल अब मातप भारत भइसके नि त !
हो र ? हो त नि !

बबुरोरामको मुख आजभोलि हँसिलो देखिँदैन, किन ?
सवारी दुर्घटनामा त्यत्रा नेपाली हरेक दिन मरे पनि
कसैलाई आफ्नो पाटीका महान सहिद घोषणा गर्न पाएनन् नि त !
हो र ? हो त नि !

अब अर्का बित्पातले बन्दुक उठाउने रे, कतिलाई महान सहिद बनाउलान् हँ ?
उनका गुरुको बिस हजारको रिकर्ड नतोडी प्रधानमन्त्री बन्न पाउँदैनन् नि त !
हो र ? हो त नि !

दे उप बाको गडबड बडबढ कमै सुनिन्छ किन ?
तपाईंको कानमा कानेगुजी जमेको छ, कसरी सुनियोस् त ?
हो र ? हो त नि !
बत्तिसपुतली, काठमाडौं