नेपाली हास्यव्यङ्ग्य अनलाइन पत्रिका

देशको सीमा मिचिएको कुरा अहिले नझिक्नुहोस् न,
अहिले हामि सरकारमा छौँ क्या !
१९५० को असमान सन्धिको कुरा झिकौँ न
अहिले हामि प्रतिपक्षमा छौँ क्या !

आज भोलि ममको साइज सानो भएकोमा आन्दोलन गरौँ न
अब हामी पनि नेता बन्नु पर्यो क्या !
रेडियो पत्रिका र टिभीका दैनिंक समाचारका विश्लेषण गरौँ न
हामी त यो देशका बुद्धिजीवी हौँ क्या !
पन्ध्रौँ शताब्दीमा माक्र्सले मलेसियामा गरेका आन्दोलनका कुरा गरौँ न
हामी त प्रगतिशील बुद्धिजिबी हौँ क्या !
अनि बी.पी.ले लेख्नु भएको चिसोचुल्हो शीर्षकको बालकथाको कुरा गरौँ न
हामी त प्रजातन्त्रवादी बुद्धिजिवी हौँ क्या !
तपाई पनि क्या !!

जुलुस धर्ना आन्दोलन केहि नगर्नुहोस् न, यसले देशलाई नोक्सान पुर्याउँछ
अहिले हामी सरकारमा छौँ क्या !
आउनुहोस् हाम्रो आन्दोलनमा सहभागी हुनुहोस् न
अहिले हामि प्रतिपक्षमा छौँ क्या !

घोषणा गरिएका नगरपालिकाहरूको सीमाङ्कन नमिलेकोमा आन्दोलन गरौँ न
हामी पनि नेता बन्नु पर्यो क्या !
सोलोडोलो भारतको बिरोधमा गफ गरौँ न
हामी त राष्ट्रवादी हौँ क्या !
नेपालप्रति भारत चीन अमेरिका रुस र तान्जानियाको नीति विश्लेषण गरौँ न
हामी त अन्तरराष्ट्रिय राजनीतिक विश्लेषक हौँ क्या !
तपाईं पनि क्या !!
बत्तिसपुतली, काठमाडौं