नेपाली हास्यव्यङ्ग्य अनलाइन पत्रिका

प्रमाण सारा पनि राखिदिन्छु म
भेटे जुटेका सब तथ्य दिन्छु म
हजार बिन्ती पनि बारबार छ
विनम्र बोलीसित द्वारद्वार छ ।

पठाउँछन् यो अनि त्यो कुनाकुना
म भेल बाढीसरि पुग्छु चौगुना
अनेक कुर्सीबिच पुग्न खोज्दछु
धपाउँछन् हिंस्रकझैँ म बन्दछु ।

यथेष्ट राखी सब तथ्य नै दिएँ
मिलाउँदै रीत पुगेर सुम्पिएँ
यताउता धेर गरी झुलाउँछन्
अबेर होस् कामसरि बनाउँछन् ।

ढिलो गरेको जब बुझ्न थाल्दछु
विनम्रता झन् अब पोख्न थाल्दछु
सुन्दैन कोही सब मौन बन्दछन्
मिलेन केही यति मात्र भन्दछन् ।

रहस्य बुझ्दै जब बढ्न थाल्दछु
जहाँ पुगूँ त्यो मन एक ठान्दछु
हुँदैन केही घुस नै जताततै
सुटुक्क खल्तीभरि खोज्छ जोसुकै ।

बुझेर आफै अति नम्र नै भई
गरूँ प्रभो ! के यति सामुमै गई
मुसुक्क हाँसी जब राख्न थाल्दछु
मिलेन थोरै यति मात्र सुन्दछु ।

थोरै दिए हुन्न भनी हकार्दछन्
दिनै नसक्दा सब काम रोक्दछन्
ल हुन्छ धेरै अब दिन्छु दिन्छु म
भने गरेको सब मान्छु मान्छु म ।

म बाध्य बन्दै अब अख्तियारमै
पुगी जुटाएँ सब द्रव्य द्वारमै
बने सबैका करबाट काम ती
भलो हओस् यो सब कर्म पद्धति ।
काठमाडौं