नेपाली हास्यव्यङ्ग्य अनलाइन पत्रिका

पर्वत खनेर कत्रो कोशिस गरेर आयो
निस्क्यो मुसा र पो यो जाँगर मरेर आयो ।

राखेर पेट खाली जस्ले छरेर आयो
रित्तै छ ऊ, कसैले धोक्रो भरेर आयो ।

सुन्दैछु सभ्य पारा सिक्दैछ गाउँ घरले,
भोकै रहे बचेरा माऊ चरेर आयो ।

सम्झन्छु भन्नु उसको होला कुनै प्रयोजन,
बिर्सेर जान्छ लठ्ठी खोला तरेर आयो ।

यो शान्तिक्षेत्र मेरो सुन्दर पवित्र धर्ती,
बन्दैछ नर्क, कस्को आँखा परेर आयो ।

मनमा लुकाई राखूँ, या यो नयन सजाऊँ,
आकाशबाट यौटा तारा झरेर आयो ।

मुर्दा मसानबाटै जागी गुहार भन्ला
आवाज गुम छ यो के बेथा सरेर आयो ??