नेपाली हास्यव्यङ्ग्य अनलाइन पत्रिका

कुमारजी आज्ञा गर्नुहुन्छ– ‘हे अगस्ते मुनि, यसअघि मैले तिमीलाई फेसबुके नारी–पुरुष, दुर्जन र पिशाच बारे कहें । आज म तिमीलाई फेसबुके मानव चरित्रबारे सङ्क्षिप्तमा कहन्छु । पौराणिक कालमा सतिदेवीको अङ्ग पतन भएको स्थानमा अङ्ग बमोजिमका शक्तिपीठहरु उत्पन्न भए । तेत्रायुग, द्वापरयुग र कलियुगको पूर्वार्धमा मानव जातिले ती शक्तिपीठहरूको पूजा–अर्चना गरे । त्यसको प्रभावले कलियुगको मध्यकालीन फेसबुके युगमा अङ्गस्थान बमोजिमका चरित्र भएका ब्यक्तिहरुको जन्म भयो । ती मध्ये केही प्रमुख अङ्गस्थाने फेसबुके मानव चरित्रबारे कहन्छु, ध्यान दिएर सुने ।’

१. मष्तिस्क स्थाने: यस्ता फेसबुके मानवले समय, परिस्थिति र अवस्थाको समग्र बिष्लेषण गरी आफ्ना बिचारहरू फेसबुकमा राख्दछ । यस्ता व्यक्तिहरूको सङ्गत गरे ज्ञान, विवेक र चेतनास्तर बढ्नुका साथै आफ्नो मान–प्रतिष्ठा पनि बढ्छ । यस्ता ब्यक्तिहरूलाई फ्रेण्ड रिक्वेस्ट पठाउने वा पच्छ्याउने (फलो गर्ने) कार्य गर्नुपर्दछ ।

२. कर्ण स्थाने: यस्ता फेसबुके मानवले विभिन्न सञ्चार माध्यममा छरपस्ट रहेका समाचार सङ्कलन गरी फेसबुकमा लिङ्कसहित शेयर गर्दछ । यस्ता ब्यक्तिहरूको सङ्गत गरे वर्तमान अवस्थामा भईरहेका गतिविधिबारे ज्ञान बढ्छ । यस्ता ब्यक्तिहरूको हौसला बढाउन कहिलेकाहीं उनीहरूको पोस्टमा लाइक र कमेन्ट हालिदिनुपर्दछ ।

३.जीभ स्थाने: यस्ता फेसबुके मानव मिठा–मिठा परिकाररका पारखी हुन्छन् र आफूले खाएका तथा गुगलद्वारा खोजिएका मिठा परिकारका चित्र राखेर आफ्ना मित्रव्यास (फ्रेण्ड सर्कल) लाई लोभ्याउँछन् र फूर्ति लाउँछन् । यस्ता ब्यक्तिको सङ्गतले ती परिकारहरु नखाए पनि हेरेर मुख मिठ्याउन पाइन्छ ।

४. नेत्र स्थाने: यस्ता फेसबुके मानवले अधिकांश उर्वशी, मेनका, अप्सराजस्ता कन्याको फोटो (फेक एकाउन्ट भएपनि) मन पराउँछन्, लाइक र ट्याग गर्छन् । नेत्रसुख चाहनेहरूले यस्ता मित्र बनाउनु उपयुक्त हुन्छ ।

५. हृदय स्थाने: यस्ता फेसबुके मानवले आफ्नो उमेरको समेत ख्याल नगरी मायाँ–पिरतीको कुरा वाक्यांश र चित्र माध्यमबाट प्रेषित गर्दछन् । भर्खरै प्रेम बसेका, अरुको माया–पिरती हेरेर रमाउने खालका ब्यक्तिहरूलाई यस्ता मित्र बनाउनु उपयुक्त हुन्छ ।

६. जनेन्द्रीय स्थाने: यस्ता फेसबुके दानवले अश्लील फोटो र लेख राख्ने, ट्याग गर्ने र अश्लील पेजहरू मन पराउने हुन्छन् । यस्ता दानवबाट टाढा रहनुपर्दछ र मित्र प्रस्ताव आएमा समेत ब्लक गरिदिनुपर्दछ ।

७. पाउ स्थाने: यस्ता फेसबुके मानवहरूको कार्य जिम्मेवारी वा इच्छा बिभिन्न स्थानमा घुम्ने हुन्छ । उनीहरु लोभलाग्दा प्राकृतिक दृष्यका चित्रहरू, स्थानीय व्यक्तिका चित्रहरू प्रेषण गर्दछन् । यस्ता व्यक्तिको सङ्गत गरेमा बिभिन्न स्थानबारे जानकारी हुने भएकाले यस्ता ब्यक्तिलाई मित्र बनाउनु उपयुक्त हुन्छ र कर्ण स्थाने व्यक्तिको पोस्टमा झैं लाइक र कमेन्ट हालिदिनुपर्दछ ।’
इतिश्री स्कन्दे, पुराणे केदारखण्डे कुमार–अगस्ते संवादे फेसबुके मानव चरित्रः नामो चतुर्थ अध्याय ११ ।
(फेसबुकको स्टाटसबाट टिपनटापन)