नेपाली हास्यव्यङ्ग्य अनलाइन पत्रिका

लाग्छन् पछाडि किन हो बुझिसक्नु छैन
पुग्छन् जहाँ अब त्यहाँ पुगिसक्नु छैन 
सोझा सिदा भइ यहाँ मति नाउँ छैन
चाकर भुलेर अरुको रति ठाउँ छैन ।

साँचो नबोल कहिल्यै गर ढाँट बोली
बोलेर सत्य सजिलो पछुतो छ भोलि
सम्झेर बोल रसिलो तब काइदा छ
चिप्ले बनेर रहँदा कति फाइदा छ ।

छन् स्वार्थका सब घडा कहिले भरिन्छन्
कस्को सहाय हुन गै प्रतिफल छरिन्छन्
चाहिन्न भो सब गयो भुल स्वाभिमान
ए चाटुकार महिमे गर है सिरान ।

जाती भएर रहनू अलि दुःख नै छ
प्यारो भई रहनु ता अझ दुःख नै छ
बोल्दै नबोलिरहँदा अपमान मिल्छ
चम्चे बनेर रहँदा अब मान मिल्छ ।

विद्या पढेर पनि खै कुन काम हुन्छ
धन्कै पछाडि प्रियता सब क्षेत्र छुन्छ
ज्ञानी बनेर रहनू किन भन्नु साथी
ज्ञानादि नष्ट हुन गो चतुरादि जाती ।

दियाले, ओखलढुङ्गा