नेपाली हास्यव्यङ्ग्य अनलाइन पत्रिका

कहिले अल्पमतले नै चलाउनुहुन्छ
कहिले बहुमत पुर्‍याउनुहुन्छ
कहिले मिलिजुली चलाउनुहुन्छ
कहिले दुईतिहाइ नै पुर्‍याउनुहुन्छ
हाम्रा भाग्यदाता उहाँहरू
देश र जनताको कति चिन्ता लिनुहुन्छ !

कहिले अधिवेशन बन्द गर्नुहुन्छ
कहिले अध्यादेश ल्याउनुहुन्छ
हाम्रा कानहरू पवित्र पार्न
जाँगर चलाएर भाषण गरिदिनुहुन्छ
हाम्रै सुविधाका लागि कष्ट उठाएर
कोमल बाहुलीबाट उद्घाट गरिदिनुहुन्छ

हाम्रा जीवनदाता उहाँहरू
देश र जनताको कति चिन्ता लिनुहुन्छ !
नेपाललाई सिंगापुर बनाउन चाहनुहुन्छ
स्विट्जरल्यान्ड,अमेरिका बनाउन चाहनुहुन्छ
त्यसैले मन्त्रालय फुटाउँदै हुनुहुन्छ
मन्त्रीहरू बढाउँदै हुनुहुन्छ
कति मन्त्रालय र मन्त्री भएपछि
विकास र समृद्धि आउनुहुन्छ !
हामी अज्ञानीलाई के थाहा !

हाम्रा भगवान् उहाँहरू
देश र जनताको कति चिन्ता लिनुहुन्छ !
पाँचवर्षमा एकदिन भए पनि
चुनाव घोषणा गरिदिनुहुन्छ
हाम्रा घरघरमा आइदिनुहुन्छ
आश्वासन बाँड्नुहुन्छ,घोषणापत्र पढाउनुहुन्छ
हामी खानका लोभीहरूलाई
मजाले मासुभात खुवाउनुहुन्छ
राष्ट्रनिर्माता उहाँहरू
देश र जनताको कति चिन्ता लिनुहुन्छ !

ओखलढुङ्गा