नेपाली हास्यव्यङ्ग्य अनलाइन पत्रिका

आर. आर. चौलागाईं :

खै, राजतन्त्र गएर पनि के लछारपाटो लाग्यो र !
खै, गणतन्त्र आएर पनि के लछारपाटो लाग्यो र !
देश अँध्यारो छ, जनजीविका पनि डाँवाडोल र तहसनहस छ
खै, चुनाव भएर पनि के लछारपाटो लाग्यो र !

हेटौडा

………

धर्म तिवारी :

घोच्छन् अचेल सियो बनी निर्जीव यी तस्विर पनि
न फेरिन्छ जिन्दगी यो न बदलिन्छन् तकदिर पनि
रामहरू रावण बन्छन् आजभोलि लङ्का पुग्दा,
रगताम्मे हुन्छन् मन्दिर उस्तै देख्छु मस्जिद पनि ।

भोजपुर

………

विमल गिरी :

जिब्रो लटपटाउँदै रुन्छन् भन्ने सुनेको छु
मातेपछि नराम्रो सुन्छन् भन्ने सुनेको छु
मदिरा र मस्तीको म बबुरोलाई के थाहा
सुरामा सुन्दरीहरू हुन्छन् भन्ने सुनेको छु ।

………

श्याम रिमाल :

‘यो देश बन्दैन’ भनी कति बकबक गर्नु ?
श्रम चोरी अर्कालाई कति धारेहात लगाउनु ??
कुरा अर्काको नकाटिदिए मात्र देश बन्छ यो छिटो
डोकामा अर्ती दिई आफू कति तिलसँग जोखाउनु ???

नुवाकोट

………

रमेश बिष्ट :

देश वदल्न त विचारको तरवार चाहिन्छ
जनता रिजाउन गतिलो सरकार चाहिन्छ
परनिर्भर छुचुन्द्राहरूको रजाई कति सहनु
खवरदार भन्नु नपरोस् ! पुरानै दरवार चाहिन्छ ।

काठमाडौं

………

मनोज लामिछाने :

छोट्टिँदै गएको
स्त्री–बस्त्र पहिरन बजार
पातलो र कसिलो हुँदै गा’छ
तल छोपे माथि खाली
माथि छोपे तल अचाक्ली
घरिघरि तान्दै छोप्नुपर्ने भा’छ ।

गोरखा