नेपाली हास्यव्यङ्ग्य अनलाइन पत्रिका

डा. ऋषि बस्ताकोटी

१. बगलीमा छुरा

पक्रिएको सुन हेर्दा तामा भएपछि
समातेका अपराधी ‘मामा’ भएपछि
न्याय अनि समृद्धिको बाटो कहाँ भेट्नु
बगलीमा छुरा, मुखमा राम भएपछि ।

२. गन्तव्य

आजभोलि प्रभुहरूको मन्तव्य फेरिएको छ
परिभाषामा अब सभ्य-असभ्य फेरिएको छ
उहाँहरूकै विश्वास गरिगरी पछि लागियो
पुग्ने कहाँ, जब अगुवाकै गन्तव्य फेरिएको छ ।

३. दरबारै सानुभो

स्वकीयको सुविधा पनि आफैँ लानुभो
सरकारी तेल पनि मिलाइवरी खानुभो
हिजोका छाप्रा कटेरा नसम्झाऊ भो
आज त दरबारै उहाँलाई सानुभो ।

४. अग्रगामी छलाङ्ग

सुन देखिए, सराब सँगसँगै सारी देखिए
महिनादिनसम्म घरि वारि घरि पारि देखिए
संस्कृतिको नाममा अग्रगामी छलाङ्ग होला शायद
विकृतिको अग्रमोर्चामा ’सुशिक्षित’ नारी देखिए ।

५. थपियो

समृद्धिका कथाले के भो खै, मात्र दुनियाँका रहर थपियो
सुविधामा आफ्नै लागि भनेर गाडी थपियो, घर थपियो
विकासको बाढी आउने कुरा थियो गाउँसहर जताततै
उतै अल्मलियो सायद, यता त केवल ऋण थपियो, कर थपियो ।

०००
‘विसङ्गत बस्ती’ (२०७९)