नेपाली हास्यव्यङ्ग्य अनलाइन पत्रिका

इलाम, २०८०, चैत्र १६ । इलाम साहित्य महोत्सव २०८० इलाममा सुरु भएको छ । पर्यटन प्रवर्द्धन गर्ने उद्देश्यले इलाम नगर साहित्य कला सङ्गीत प्रतिष्ठान र इलाम साहित्य समाजको संयुक्त आयोजनामा दुई दिने ‘इलाम साहित्य महोत्सव’को आयोजना गरिएको हो ।

महोत्सवको नेपाल प्रज्ञा प्रतिष्ठानका कुलपति भुपाल राईले उद्घाटन गर्नु भयो । उद्घाटन संस्कृति भनेको चिन्तन प्रणाली हो भन्दै कुलपति राईले सांस्कृतिक सत्ताको स्थापना नगरी देश सम्पन्न नहुने बताउनु भयो । मौलिक ज्ञान प्रणालीको सांस्कृतिक सत्ता आवश्यक रहेको बताउनु भयो ।

पर्यटन प्रवर्द्धन गर्ने उद्देश्य सहित महोत्सव आयोजना गरिएको इलाम नगर साहित्य कला सङ्गीत प्रतिष्ठानका अध्यक्ष प्रकाश थाम्सुहाङले बताउनु भयो ।

‘पर्यटनका लागि साहित्य’ भन्ने नाराका साथ थालिएको महोत्सवमा नेपाल र भारतका साहित्यकार, विश्लेषक, लेखक, कलाकारको सहभागिता रहेको छ । नेपाल प्रज्ञा प्रतिष्ठान र नेपाल समाजको सहयोगमा सञ्चालित महोत्सवमा नेपाल र भारतका दुई सय बढी साहित्यकार , लेखक, राजनीतिकर्मी लगायतको सहभागिता रहने आयोजकले जनाएको छ ।

इलाम सदरमुकामस्थित गौतम बुद्ध सभागृहमा भइरहेको महोत्सवमा साहित्यकार, कलाकार, विश्लेषक, चिन्तक, राजनीतिकर्मी लगायतलाई एकै थलोमा जमघट गराई बहस छलफल थालिएको छ ।

कार्यक्रममा राजनीति, साहित्य, पर्यटन, पर्यावरण, नाटक जस्ता विधामा बहस राखिएको छ भने विचार, कविता, गजल वाचन महोत्सवको आकर्षणको रुपमा रहेको छ ।

कार्यक्रमको पहिलो प्रस्तुति पूर्व प्रधानमन्त्री डाक्टर बाबुराम भट्टराईले नेपालको संरचनात्मक संकट र दिगो समाधान विषयमा सम्भाषण सम्पन्न भएको छ ।

पहिलो दिन आज ‘सङ्घीयतास् यस्तै वा कस्तो’ शीर्षकमा नवीना लामा, मिलन पाण्डे र डिल्लीराम सुवेदीको बहस बचचु हिमांशु, ‘कवितामा के छ शीर्षकमा सोझो गाउँले, सुन्दर कुरूप र सुमिनाको बहस, ‘मिथकदेखि मिथकसम्म’ शीर्षकमा डाक्टर अरुण गुप्ता र धनप्रसाद सुवेदीको बहस, सीमा देखि सीमा साहित्य र संस्कृति शीर्षकमा डाक्टर कविता लामा, गणेश खनिया र दिपक लुङ्गेलीको बहस हुने तालिका छ ।

यस्तै ‘पोयट्री इन मुभमेन्ट’ शीर्षकमा राजा पुनियानीको सम्भाश, नेपाल २०३० समुन्नतिका लक्ष्य, चुनौती र इलाम सन्दर्भमा डाक्टर स्वर्णिम वाग्लेको सम्भाश, ‘बदलिँदो विश्व फेरिँदो स्थानीयता’ शीर्षकमा रोहेज खतिवडा, धर्मेन्द्र नेम्बाङ र रञ्जित तामाङको बहस, ‘चारखोलको रङ्गमञ्च’ शीर्षकमा सुरेश पोर्तेल र चेतन आङ्थुपोको बहस हुने कार्यक्रमको तालिमा समावेश छ । ‘कविताको स्वर’ शीर्षकमा गद्य कविता वाचन र ‘छन्द सुगन्ध’ शीर्षकमा पद्य कविता बाचन पनि हुनेछ ।

दोस्रो दिन शनिबार ‘संरक्षण र पर्यापर्यटनका कुरा’ शीर्षकमा सोनाम भुटिया र दीपेन्द्र कर्णको बहस, ‘मातृभाषाको सकस’ शीर्षकमा सुरेश किरण, चन्द्र किशोर र गौरी तमुको बहस हुनेछ ।

‘उमेरको कथा’ शीर्षकमा अभि सुवेदीसँग दीपक सापकोटाको बहस , ‘सिनेमास् कस्तो मौलिकता शीर्षकमा केकी अधिकारी, मीन भाग र रामबाबु गुरुङको बहस र ‘अक्षर मोहस् अक्षर यात्रा’ शीर्षकमा शैलेन्द्र अधिकारी, शङ्कर तिवारी र टीका आत्रेयको बहस हुनेछ ।

साहित्यमा प्रतिरोध शीर्षकमा शैलेन्द्र अधिकारी, शङ्कर तिवारी र टीका आत्रेयको बहस हुनेछ । समय, समाज र राजनीतिका कुरा शीर्षकमा डाक्टर सिके राउत, प्रदीप ज्ञवाली र विश्वप्रकाश शर्माको बहस र गजल बाचन हुने तालिका रहेको आयोजकले जनाएको छ । महोत्सवमा चित्रकला प्रतियोगिता पनि राखिएको छ ।

उद्घाटन कार्यक्रममा इलाम नगरपालिकाद्वारा कलाकार कोमल निरौला, साहित्यकार राधेश्याम लेकाली र मूर्तिकार विष्णुप्रसाद श्रेष्ठलाई सम्मान पत्र र दोसल्लासहित सम्मान गरिएको छ ।

०००

-रेडियाे नेपालका लागि सविता पाण्डेद्वारा संप्रेषित