नेपाली हास्यव्यङ्ग्य अनलाइन पत्रिका

मिरिक / ६ अप्रेल २०२४ अर्थात् २४ चैत २०८० शनिवारका दिन दार्जिलिङ जिल्लाको मिरिक नगरपालिकाअन्तर्गत प्रेमचन्द्र स्मृति पुस्तकालयको सभा हलमा र यही नपामा स्थापित साहित्यिक संस्था साहित्य सुनौँ परिवार मिरिक (सासुप )ले आफ्ना नियमित गरिँदै आएको कार्यक्रमअन्तर्गतको यो एकशय पाँचौँ मासिक कार्यक्रम श्रृङ्खला सम्पन्न गरेको हो ।

संस्थाका अध्यक्ष राजबहादुर राईको अध्यक्षता तथा केसाङ लामाको प्रमुख आतिथ्य रहेको कार्यक्रममा सुमित्रा रुम्दालीको विशिष्ट आतिथ्य रहेको थियो । मञ्चासिन अतिथिवर्गलाई खदार्पणपछि दीप प्रज्ज्वलन गरी कार्यक्रमको घुम्टी खोलिएको हो ।

यसै प्रसङ्गमा केही मन्तव्य, रचनावाचन, संस्थाको नियमित कर्महरूको सूचीमा विगतका कर्मको स्मरण, वर्तमानको व्यवस्थापन र भोलि वा आगामी दिनहरूमा गर्ने कार्यहरूको बारेमा छलफल, विश्लेषण तथा तयार गरिएको कार्ययोजनालाई बुँदागत रूपमै सर्वसम्वत अनुमोदन गरिएको थियो । विगतका दिनमा अगमसिँह गिरी साहित्यिक प्रतिष्ठान सौरेनीसँग समन्वय गरी संयुक्त रूपमा नेपाल पोएट आइडलमा प्रतिस्पर्धा गरिरहेका अनिल विद्रोही उर्फ ‘गोर्खे चार्ली’ लाई भोट अपिल गरिदिएको हो । औचित्यको क्रममा सचिव शीला लामाले बताइन् ।

त्यसैगरी कार्यक्रममा अघिल्लो कार्यक्रमको प्रस्तावहरू सह-सचिव दीप प्रधानले प्रस्तुत गरेका थिए भने मिरिकलाई केन्द्र बनाई यसैको आसपासमा हुने गरेका र भइरहेका साहित्यिक कार्यक्रमको गतिविधिबारे उपस्थित सदस्यहरूले आ-आफ्ना मन्तव्य राखेका थिए ।

आगामी हुने भानुजयन्ती र नेपाली भाषा मान्यता दिवस यही संस्थाले मिरिकका विभिन्न विद्यालयहरूसँग समन्वय गरिने प्रस्ताव पारित गरिएको थियो । साथै संस्थाको तर्फबाट प्रकाशन हुँदै आएको पुस्तक पाँचौँ अङ्क प्रकाशोन्मुख रहेको जानकारी गराउदै साहित्यकारहरूबाट उचित रचनाहरू अपेक्षा गरिएको र उक्त अङ्क वरिष्ठ साहित्यकार अर्जुन प्रधानमा केन्द्रित रहने कुरा उपस्थित सबैमा जानकारी गराइएको थियो ।

त्यसैगरी आगामी ४ मई २०२४ का दिन संस्थाले वसन्तोत्सव/ वैशाख उत्सव भव्य रूपमा मनाउने निर्णय भएकाले इच्छुक साहित्यकारहरूले २४ अप्रेल २०२४ मा क्रमशः अध्यक्ष , सचिव र कोषाध्यक्ष राजबहादुर राई , शीला लामा र डा.कमला तामाङसँग सम्पर्क राख्न अनुरोध गरिएको व्यहोरा पनि सार्वजनिक गरिएको थियो ।

आगामी दिनमा गरिने साहित्यिक कार्यक्रम साहित्य एकाडेमी दिल्लीसँग संयुक्त रूपमा मिरिकमा नै गरिने प्रस्ताव पनि पारित गरिएको थियो ।

यसै क्रममा मञ्चासिन अतिथिवर्गबाट संस्थाको उत्तरोत्तर प्रगति र समृद्धिको कामना पनि व्यक्त भएका थिए । त्यसो त मिरिककी शान नारी हस्ताक्षर डा.कमला तामाङ भर्खरै साहित्य एकाडेमी दिल्लीमा भएको साहित्यिक कार्यक्रममा सहभागी भई फर्किएकी थिइन् । आजको कार्यक्रममा पारसमणि राई र अङ्कित गजमेरको पनि उपस्थिति रहेको थियो ।

कार्यक्रमको अन्त्यतिर अमर दुङ्माली – मुक्तक, एसबी गजमेरले कवि दीप प्रधानको रचना आवृत्ति शीर्षकको- कविता, अजम प्रधान- कथा, जीनर घतानी – कविता, डा.कमला तामाङ- कविता, गणेश बराइली- गजल, एसबी थापाले श्रद्धाञ्जली शीर्षकको- कविता र शीला लामाले- कथा आदि रचनाहरू स्रष्टाहरूले प्रस्तुत गर्नुभएको थियो ।

अन्त्यमा संस्थाका अध्यक्ष राजबहादुर राईको तर्फबाट आजको कार्यक्रमको छोटकरी समीक्षासहित कार्यक्रम विधिवत रूपमा समापन भएको जानकारी भएको थियो ।

साहित्य सुनौँ परिवार मिरिकको आयोजना रहेको सो कार्यक्रममा संस्थाकी सचिव शीला लामाको सञ्चालन, स्वागत मन्तव्य र औचित्यसमेत रहेको स्रष्टा दीप प्रधानले जानकारी दिए ।

०००
मेची प्रतिनिधि नदी भट्टराईद्वारा संप्रेषित