फित्काैली डटकमगजल तथा गीतकार प्रकट पगेनी ‘शिव’काे असामयिक निधन
जण्डिस र निमोनियाबाट गम्भीर बिरामी भई मणिपाल शिक्षण अस्पतालमा उपचार गराइरहेका पगेनीको आज दिउसो ३ बजेतिर निधन भएको हो ।
पोखरा, २०८१ वैशाख ४ । ख्यातिप्राप्त गजल स्रष्टा एवम् गीत प्रकट पगेनी ‘शिव’को निधन भएको छ । जण्डिस र निमोनियाबाट गम्भीर बिरामी भई मणिपाल शिक्षण अस्पतालमा उपचार गराइरहेका पगेनीको आज दिउसो ३ बजेतिर निधन भएको हो ।
आइसियु हुँदै भेन्टीलेटरमा राखेर उपचार भइरहेकोमा अन्ततः उनको निधन भएको साहित्यकार रुपिन्द ्रप्रभावीले जानकारी दिएका छन् ।
७० वर्षीय प्रकट पगेनी कास्कीको रुपा गाउँपालिका वडा नं ५ का स्थायी वासिन्दा हुन् । उनका पत्नी, एक छोरा र एक छोरी छन् ।
प्रकट पगेनीका कविता र गजलका कृतिहरू प्रकाशित भएका छन् भने ‘तगारो छेउ आएर पनि आँगनी टेकिनौ’ जस्ता गीतहरू चर्चित रहेका छन् ।
उपचार प्रक्रियामा अधिकतम रकम लाग्ने देखिएकाले मङ्गलबारदेखि पोखरेली स्रष्टाहरूको सक्रियतामा आर्थिक संकलन अभियान थालिएको थियो । उनको उपचारका लागि पोखरा महानगरपालिकाले रु. १ लाख उपलब्ध गराउने निणर्य गरेको थियो ।
पोखरेली सांस्कृतिक परिवारका अध्यक्ष उपेन्द्र पौडेलले रु २५ हजार प्रदान गरी उपचार कोष स्थापना गर्दै सार्वजनिक अपील गरेका थिए ।
दिवङ्गत प्रकट पगेनी ‘शिव’को अन्तिम संस्कार बुधवार गरिने जानकारी उनको पारिवारिक श्रोतले दिएको छ ।
०००
प्रकट पगेनी ‘शिव’काे एउटा कविता
‘कालीगण्डकी’
प्रकट पगेनी ‘शिव’
फरक हुन्छन्
बग्ने खोलाका धारहरू
बग्ने नदीका सिमानाहरू र
माटोलाई स्पर्श गर्दै हिँड्ने पानीका लयहरू
पानीले लिएर बग्ने संस्कार
खोलाले दिएर बग्ने उद्गार
र
नदीले जुनीजुनी जिएर बग्ने ओमकारहरू
त्यो पानी
त्यो खोला
त्यो भिन्दै नदीको मुहान भएर बग्ने
उनी कालीगण्डकी हुन्
उनै नदीका छालहरूले पिट्दै
आकार लिएको शालिग्राम
र आदिम युगको दस्ताबेज बनेर
हाम्रो शिरमा उभिएको मुक्तिनाथ
हाम्रो धरोहर हो
वैदिककालको सूत्रधार
कालीगण्डकी पवित्रधामले
कागबेनी, गलेश्वर, मोदीवेणी, जैमिनी
रिडी, रुद्रवेणी, उत्तरबाहिनी, राम्दी, देवघाट
सभ्यता, संकृति, जीवन र जगतसँग आबद्ध कालीगण्डकीलाई
आफ्नै लयमा बग्न देऊ
आफ्नै वयमा रम्न देऊ
होसियार-
कालीगण्डकीमाथि
कुनै कुशासनको नजर नपरोस् ।
०००
पोखरा
