नेपाली हास्यव्यङ्ग्य अनलाइन पत्रिका

मकवानपुर, २०८१ साउन १२ । साहित्यकारद्वय स्व. अप्सरा तिम्सिना र स्व. दीपक मुडवरी स्मृतिविशेष रचना वाचन कार्यक्रम आयोजना सम्पन्न भएको छ । आँचल साहित्य कला पुञ्ज र साहित्य सङ्गम मकवानपुरको ३४५औँ नियमित साहित्य सन्ध्याका क्रममा संयुक्त आयोजनामा सो कार्यक्रम आयोजना गरिएको हो ।

शिक्षाविद् देव श्रेष्ठको प्रमुख आतिथ्य र साहित्य सङ्गम मकवानपुरका अध्यक्ष डीबी बर्तौलाको अध्यक्षतामा आयोजित कार्यक्रममा सङ्गमका सल्लाहकार निमेष निखिलको विशिष्ट आतिथ्यता, आँचल साहित्य कला पुञ्जको संस्थापक मुना धिताल, नेपाल प्रज्ञा प्रतिष्ठान काव्य विभाग सदस्य शान्ति प्रियवन्दनाको आतिथ्य रहेको थियो ।

स्रष्टाद्वय तिम्सिना र मुडवरीको स्मृतिमा मौनधारणबाट सुरू भएको कार्यक्रममा उहाँहरूका ३/३ रचनाहरू सबिता तिमल्सिना, भवानी तिमल्सिना, एलिजा गौतम, संप्रस पौडेल, सानु खनाललगायतका सर्जकहरूले वाचन गर्नुका साथसाथै श्रष्टाहरू राजुराम राउत, सुबास सजल, सानुभाइ विश्वकर्मा, किशन पौडेल, देवराज तिवारी, पुरूषोत्तम आचार्य, विष्णुप्रसाद गौतमलगायतले आ-आफ्ना रचना वाचन गर्नुभयो ।

स्व. अप्सरा तिम्सिना र आँचल साहित्य कला पुञ्जः
स्व. तिम्सिनाका ‘अभ्यन्तर’ कथा सङ्ग्रह र ‘किनाराका आवाजहरू’ कविता सङ्ग्रह गरी दुई कृति प्रकाशित छन् । वि.सं. २०६९ सालमा स्थापना भएको आँचलको नेतृत्वमा रहेर स्व. तिम्सिनाले मकवानपुरको साहित्यिक इतिहासमा उल्लेख्य योगदान दिनु भएको थियो ।

४६ वर्षको छोटो आयु लिएर आउनु भएकी उहाँले महिला लेखकहरूलाई संगठित गर्ने र राष्ट्रियस्तरका लेखकहरूसँग समन्वय, सहकार्य र निरन्तर सम्पर्कमा रहने अभ्यासलाई जोड दिनु भएकोले मकवानपुर मात्रै नभइ नेपालका थुप्रै साहित्य सर्जकहरूले बिर्सन नसक्ने नाम बनेको साहित्यकार माया ठकुरी बताउनु हुन्छ ।

यस्तै निवर्तमान अध्यक्ष अनिता तिमल्सिना स्व. तिम्सिनाले संस्थालाई केवल संस्थाभन्दा आफ्नो घरका रूपमा माया गर्ने र सदस्यहरूलाई सोहीअनुसारको मायाप्रेमले संगठित गर्दै लेखनमा हौसला दिने गरेको सम्झनुहुन्छ ।

निरन्तर सक्रिय सहभागितामा साहित्यिक गतिविधिहरू सञ्चालन गर्दै आइरहेको आँचल साहित्य कला पुञ्ज मकवानपुर महिला साहित्य सर्जकहरूद्वारा सञ्चालित संस्था हो ।

स्व. मुडवरी र नेपाली साहित्यमा योगदानः
“अठोट” त्रैमासिक पत्रिका हेटौंडाबाट प्रकाशित स्व. मुडवरीले नेपालकै स्थापित तथा नव साहित्यसर्जकहरूका रचनाहरू प्रकाशन गराउनु भएको हो । अमेरिका निवास रहँदा नै “केही अस्पष्ट रेखाहरु” (२०७४) मा प्रकाशन गराउनु भएका मुडवरीको दोस्रो कविता सङ्ग्रह “केही अतृप्त स्पर्शहरू” प्रकाशनको तयारीमा हुँदाहुँदै देहान्त भएको हो । यसअघि उहाँले आफ्ना दिवङ्गत मातापिताको नाममा साहित्य सङ्गम मकवानपुरले व्यवस्थापन गर्नेगरी “सुभद्रादेवी–मदन मुडभरी स्मृति काव्य पुरस्कार” स्थापना गर्नु भएको थियो ।

कार्यक्रममा आँचलका संस्थापक तथा महाकाव्यकार मुना धिताल अर्यालले स्वर्गीय स्रष्टा तिम्सिनाले छोटो उमेरमैँ मकवानपुरको महिलाहरूका लागि साहित्यिक क्षेत्रबाट उल्लेख्य काम गर्नु भएको र स्रष्टा मुडवरीले मकवानपुरको साहित्यिक इतिहासमा मानक कार्य गर्नु भएको भनाइ राख्नुभयो ।

प्रमुख अतिथि देव श्रेष्ठले स्व. स्रष्टाहरूसँगको विगतका सम्बन्धहरूबारे चर्चा गर्दै आफ्नो रचना सुनाउनुभयो भने सभाध्यक्ष डीबी बर्तौलाले स्रष्टाहरूलाई सम्झने परम्परा रहेको र यस्ता कार्यक्रमले उहाँहरूका रचनालाई अझ अमर बनाउने अपेक्षा लिएको व्यक्त गर्नुभयो । साहित्य सङ्गम उपाध्यक्ष सानु खनालले स्वागत गर्नु भएको कार्यक्रमलाई सङ्गमका सचिव मनोज पोखरेलले सहजीकरण गर्नु भएको हो ।

स्वर्गीय स्रष्टाद्वयको स्मृतिमा आँचल साहित्य कला पुञ्ज तथा साहित्य सङ्गम मकवानपुरको संयुक्त आयोजनामा हुने स्मृतिविशेष रचना वाचन कार्यक्रम साहित्य सङ्गम र सिस्नुपानी नेपाल मकवानपुरको संयुक्त सभाहलमा आयोजना भएको हो ।

०००
– संप्रस पौडेलद्वारा संप्रेषित