नेपाली हास्यव्यङ्ग्य अनलाइन पत्रिका

देवीचरण खरेल र भक्तिमाया कडरियाकसुपुत्र रुद्र खरेलको जन्म वि.सं. २००४ भाद्र १८ गते पाँचथरमा भएको हो । तीन दाजुभाइ र तीन दिदीबहिनीमध्ये कान्छा सन्तान खरेल बाल्यावस्थामा नै पितृशोकको मर्माहत र मातृवात्सल्यबाट वञ्चित हुन पुगेका थिए । २०२४ मा एस.एल.सी. उत्तीर्ण गरेका खरेलको औपचारिक शिक्षा स्नातकोत्तरसम्म पुगेको थियो । २०२२/२३ बाट लेखनमा प्रवेश गरेका खरेलको पहिलो कृति ‘छोरीलाई’ (२०४७, कवितासङ्ग्रह) हो । ‘तपाईंको नाम के हो ?’ (२०४७), ‘तोरीलाउरे चोकमा एक छिन (२०५२), ‘बिर्सिस्यो कि ?’ (२०५७), ‘आषाढस्य प्रथम दिवसे’ (२०५९), ‘तेस्रो आँखा’ (२०६१), र ‘शब्दको भ्वाङ’ (२०६४) गरी छ हास्यव्यङ्ग्य निबन्ध कृति प्रकाशित छन् । यसैगरी खरेलका विभिन्न पत्रपत्रिकाहरूमा चारदर्जनभन्दा बढी सामयिक लेख तथा रचनाहरू प्रकाशित भएका छन् । खरेल ‘कृष्णमणि साहित्य पुरस्कार’ (२०५३), ‘हृदयचन्द्रसिंह साहित्य सम्मान’ (२०६०, २०६७) तथा ‘गरिमा सम्मान’ (२०६७) बाट सम्मानित तथा पुरस्कृत स्रष्टा हुन् । रुद्र खरेलको २०६५ भाद्र ०८ गते कृतिशेष भएका हुन् ।