नेपाली हास्यव्यङ्ग्य अनलाइन पत्रिका

गाेपेन्द्रप्रसाद रिजाल :

पोहोर परा—-रै
म फुच्चे र तिमी
जोदाहा हुँदा
माझाघरका काँक्रा
चोर्न लगाउँथ्यौ
र तिमी
खसिले धँगेराका डाँक्ला चपाए झैँ
चपाउँथ्यौ
त्यो बेला म
आफ्नै थुक उग्राउँदै
तिम्रो स्वाद नियाल्थेँ नि
हो त्यै मसिने म ।

यस्तै यस्तै
पालिघरका आल्चा
ठुलाघरेका नास्पाती
माथ्ला घरका ओखर
सबै सबैको चोर
म मसिने

तिमीले मलाइ चोर बनायौ
तिमी चोर देख्ने साक्षि
ओखरका बोक्रा फ्याँक्दा
मेरो हातमा लागेको कालो
त्यस्तै दशी प्रमाणले
म चोर ।

चोर्नको लागि चोर्ने चोर
तिमी खानका लागि चोराउने
इमान्दार चोर
तिम्रो दशी तिम्रै पेटमा हुन्थ्यो
कटहर फोरे जस्तो भुँडी फोर्न भएन
अनि त अहिले
तिमी राजनीतिमा छौ
म कर्मचारी ।
अर्थात म मसिने ।
जदौ !!!

०००
काठमाडाैं