नेपाली हास्यव्यङ्ग्य अनलाइन पत्रिका

वृद्धका मुहार चाउरी हुँदा ।
छन् त्यहाँ हजार चेतना सदा ॥
ज्ञान छन् अपूर्व साधना पनि ।
छन् यिनी अपार बोधका धनी ॥१

र्‍यालमा बगेर झर्छ राग जो ।
हीनता मरेर मिल्छ सार जो ॥
वृद्धमा रहन्छ दिव्य भावना ।
छन् त्यहाँ अभीष्ट मिष्ट चाहना ।२

श्वेत ती कपालमा हुँदा दया ।
दुःखमा सजीव घुल्छ सौम्यता ॥
लुक्नसक्छ दर्द मौनता सबै ।
मर्छ लोभ क्रोध खिन्नता सबै ॥३

वृद्ध हुन् समग्र मार्गदर्शक ।
वृद्ध स्वप्नशील हुन् मार्गरक्षक ॥
हौसला बटुल्न थाल्छ जीवनी ।
वृद्ध काव्यकार हुन् कथा यिनी ।

शुद्ध छन् विचार वृद्ध माझमा ।
कर्म फुल्छ फल्छ वृद्ध काँधमा ॥
ओखती बनेर वृद्ध छन् खडा ।
वृद्ध हुन् मसाल क्रान्तिका घडा ॥५

०००
भक्तपुर