नेपाली हास्यव्यङ्ग्य अनलाइन पत्रिका

रामप्रसाद पन्थी :

हिजो पो गाला डिम्पल थिए रिङ्कल परेछन् ।
अनार दाना मिलेका दाँत जम्मै पो झरेछन् ।

फुलेको केश बढेको दारी गोडा यी थर्थर
मिठास थियो बोलीमा हिजो भएछ लर्बर ।

लिपेर हिंडे फुलेको केश दलेर कालोले
भर्दियो टम्म झरेका दाँत बिर्खेको सालोले

थिएन थाहा भएको बुढो तन्नेरी लाग्दथ्यो
युवती देखे पिरती गाँस्ने रहर जाग्दथ्यो ।

रहर थियो डेटिङ्ग जाने मायाको साथमा
गरौंला गफ भनेको थिएँ सुतेरै काखमा ।

खिचेर सेल्फी टिक्टक गर्ने मनको रहर
रहर मात्रै हुने भाे पक्का भयो नि ठहर ।

टुसुक्क मात्रै बसेको थिएँ कामना बसमा
डुबेको थिएँ धुनमा आफ्नै रङ्ग र रसमा ।

चिटिक्क राम्री आएर बसिन् युवती कोखैमा
बाजे पो भन्दा तर्सिएँ म त रहिन होसमा ।

थिएन थाहा भएको बुढो आजै पो थाहा भो
पाएर थाहा भएको बुढो मनमा डाहा भो ।

०००
रेसुङ्गा न पा- २, गुल्मी