नेपाली हास्यव्यङ्ग्य अनलाइन पत्रिका

कविराज घिमिरे :

म मान्छेहरूले दिएको जडौरी
जुवा दाउ लाग्दा मिलेको जितौरी
म आफैँ छु खोक्रो जता छाम शून्य
अभागी न भागी न पापी न पुण्य ।। १

न छुट्टै छ अस्तित्व जोडिन्छ नाम
फलानो बुबा हो चिनाइन्छ जान
छु मामाहरूको म भान्जो पियारो
र आमाबिना झन् छ नाता उधारो ।। २

यहाँ छैन मेरो कुनै बस्न ठाम
न राखेँ स्वयम्‌ले छ जो आज नाम
बुबाकै मुमाकै प्रसादी लिएर
चलेको छु नासो उनैको पिएर ।। ३

न भार्या न छोरा थिए जन्मदा म
न मर्दा हुने छन् सँगै साथ जान
त्यसैले यहाँ छैन आफ्नो भनेको
छ बेकार झुत्रो म भन्दै गनेको ।। ४

फुटानी छ हाम्रो भएँ आज जान्ने
भलो बात गर्दा कसैको नमान्ने
पढाए बढाए यसै निम्ति हो कि ?
सबै भुल्न थाल्यौँ चुँडाएर नेती ।। ५

पिता हुन् महान् जिन्दगीका मुहान
र आमा रहेकी हियाभित्र जान
मनाही गरी बस्छ जो सत्य बात
नउठ्ने गरी लड्छ छुट्टिन्छ साथ ।। ६

०००
भक्तपुर