नेपाली हास्यव्यङ्ग्य अनलाइन पत्रिका

मोक्ष खतिवडा :

बारी यता बन्जर छन् बनेका
वृद्धाहरू छन् अझ एक्लिएका
जहान छैनन् रखवाल गर्ने
माया भरोसा अब छैन गर्ने (१)

पिता भए वृद्ध र रुग्ण माता
स्याहारमा जुट्दछ को विधाता
विदेशमा मोज गरेर बाँच्ने
सन्तान यस्तै नित सोच राख्ने (२)

पैसा पठाई नत रोग हट्छ
न वृद्धको यो मन शान्ति हुन्छ
सामिप्यता होस् अब पुत्र आओस्
मातापिताको छ विचार यस्तो (३)

मातापिता छन्अति चिन्तनामा
कुरा अनेकौं मनका कुनामा
आपत्ति भो आज त डुल्नलाई
सकिन्न त्यो आँगन पुग्नलाई (४)

सुवर्ण होस् या त हिरा सँगैमा
बेकार लाग्छन् नि अशक्ततामा
खै स्नेह नै आज विलुप्त झैँ भो
अत्यास लाग्ने अझ जिन्दगी यो (५)

आमा र बाबा जब प्राण त्याग्छन्
छोरो तबै मात्र त गेह पुग्छन्
विदेशको मोह बढेछ कस्तो
सन्तानले राष्ट्र कि भुल्छ जस्तो (६)

०००
शान्तिनगर, झापा