नेपाली हास्यव्यङ्ग्य अनलाइन पत्रिका

कविराज घिमिरे :

पखेटाका न्याना श्रेय सौगात पाई
भुलेका छन् जोडी नित्य आनन्द आई
परुन् आपत् जस्ता खेप्न जागा हुँदै छन्
मिलेका साथी झैँ वृद्धवृद्धा सँगै छन् ।। १

बढी छोराछोरी भुर्र उड्दै चहार्छन्
उतै दानापानी खानलाई बढार्छन्
जहाँ जाउन् आफ्ना स्थान आफ्नो लिँदै छन्
मिलेका साथी झैँ वृद्धवृद्धा सँगै छन् ।। २

दुखेमा यौटाले सुम्सुम्याएर अर्को
निको पार्दै जान्छन् औषधी हुन्छ अर्को
दुवै मस्की बस्छन् काल टर्दै छ झन् झन्
मिलेका साथी झैँ वृद्धवृद्धा सँगै छन् ।। ३

न चाहिन्छन् अग्ला बस्नलाई मकान
यिनै झुप्रा हुन्छन् मार्नलाई थकान
अहो! प्रेमी यस्ता वन्दनायोग्य बन्छन्
मिलेका साथी झैँ वृद्धवृद्धा सँगै छन् ।। ४

जगत्को आत्मामा शान्तिको साथ पाई
हटाए बिस्तारै भोकको बैँसलाई
बनी ईर्ष्या टाढा नित्य श्रीराम जप्छन्
मिलेका साथी झैँ वृद्धवृद्धा सँगै छन् ।। ५

परे अफ्ठ्यारोमा युक्ति खोज्नै परेन
दुवै यी ज्ञाता छन् आँसु थोपा झरेन
सबैले पछ्याऔँ मार्ग चौडा यिनै छन्
मिलेका साथी झैँ वृद्धवृद्धा सँगै छन् ।। ६

०००
भक्तपुर