नेपाली हास्यव्यङ्ग्य अनलाइन पत्रिका

कविराज घिमिरे :

निराशा उँभो छन् न छन् भाव गाम्भीर्य
गए यौवनाका कडा मोह सौन्दर्य
नसोची बसेको अझै बाल क्रीडा छ
अनौठो लुकेको यहाँ वृद्धपीडा छ ।।१

थिए बैँसका ती धुवाँधार जो छाल
सबै छन् दबेका स्वयं हुन्छ बेहाल
छ आँधी पसेको हियो मात्र दीर्घा छ
अनौठो लुकेको यहाँ वृद्धपीडा छ ।। २

छ सम्पत्ति टाढा मुठीबाट छोडिन्छ
विपत् रोग आफ्नो लगातार जोडिन्छ
कला छैन नौलो गलाभित्र निद्रा छ
अनौठो लुकेको यहाँ वृद्धपीडा छ ।। ३

झऱ्यो प्रेम वास्ना भएको छ दुर्घात
गलेको छ माथा दिने चोट निर्घात
न छन् सम्झना यी मनोभाव ढिला छ
अनौठो लुकेको यहाँ वृद्धपीडा छ ।। ४

भए पुत्रपुत्री सबै दूर छौँ त्रस्त
अकेला हुँदा छौँ निराधार एकत्र
न मान्छन् कसैले यदा प्राण हीरा छ
अनौठो लुकेको यहाँ वृद्धपीडा छ ।। ५

०००
भक्तपुर