नेपाली हास्यव्यङ्ग्य अनलाइन पत्रिका

कविराज घिमिरे :

आशा टुटे गलत वृद्ध गरेर कर्म
भाषा र राष्ट्र कमजोर बने अकर्म
भन्दै छ आज जनता उठ वृद्ध जाक्न
वृद्धाहरू सबल छन् अब राज्य हाँक्न ।। १

पार्टी सबै तल पुगे जति हुन् पुराना
नेतृत्व भ्रष्ट सकिनेछ छिटै धरामा
आए युवा सकल वृद्ध भएर पाक्न
वृद्धाहरू सबल छन् अब राज्य हाँक्न ।। २

बेला थियो असजिलो अधिकांश ठाउँ
सर्वत्र हो सहर त्रस्त सुदूर गाउँ
यौटै थिइन् विषम यो स्थितिलाई ढाक्न
वृद्धाहरू सबल छन् अब राज्य हाँक्न ।। ३

मन्त्री बनेर महिला र प्रधानमन्त्री
पाएर देश बलियो छ भएर तन्त्री
आउन् अझै सफलता दिन हुन्न थाक्न
वृद्धाहरू सबल छन् अब राज्य हाँक्न ।। ४

गर्दै गए पुरुषले अति तुच्छ लीला
साँच्चै बनिन् कुशल यी महिला सुशीला
राख्नै हुँदैन गतिरोध उठौँ न फ्याँक्न
वृद्धाहरू सबल छन् अब राज्य हाँक्न ।। ५

छेक्तैन यो वय भएर असी पचासी
ऊर्जा मिली अझ कडा दगुरुन् नथाकी
हालै चुनाव सकियो नित शान्ति भाक्न
वृद्धाहरू सबल छन् अब राज्य हाँक्न ।। ६

०००
(भक्तपुर बुढ्यौली साहित्य समाजमा अभ्यास)