नेपाली हास्यव्यङ्ग्य अनलाइन पत्रिका

कविराज घिमिरे :

वृक्षका मुना खुले झुले रमेर पल्लवी
पर्नथाल्छ बोटमा चढेर मक्ख वल्लरी
क्या मजा छ सृष्टिको सुवोध दिन्छ छाउँदा
वृद्धमा खुसी फुलोस् वसन्तले भुलाउँदा ।। १

रोग राग तिर्सना हटी वसन्त मोहले
मार्ग खुल्छ रुद्ध जो अशक्त छन् प्रमोहले
दिक्क झन्झटीपना मिलेर सल्बलाउँदा
वृद्धमा खुसी फुलोस् वसन्तले भुलाउँदा ।। २

वृद्ध चाहना बढुन् विरक्त भाव दूर हुन्
एकलो हुने व्यथा सखी मिली सुदूर हुन्
कोइली मिठो गरी मिठास गान गाउँदा
वृद्धमा खुसी फुलोस् वसन्तले भुलाउँदा ।। ३

झ्याप्प छन् गुराँसका विचित्र मोहनी कला
लाल श्वेत रङ्गले जुटी जवानका बला
मिल्न थाल्छ दौँतरी यताउता डुलाउँदा
वृद्धमा खुसी फुलोस् वसन्तले भुलाउँदा ।। ४

दृश्य छन् हिमालका समस्त फाँटफाँटमा
लम्किँदै छ सूर्यको विशेष तेज खाँचमा
ताप वा चिसो दुवै समानता मिलाउँदा
वृद्धमा खुसी फुलोस् वसन्तले भुलाउँदा ।। ५

०००
भक्तपुर