नेपाली हास्यव्यङ्ग्य अनलाइन पत्रिका

सिर्जना खनाल :

नेपाल हाम्रो सान हो रक्षार्थ हामी खट्दछौँ
प्रेक्षा उज्यालो दीप हो बालेर रक्षा गर्दछौँ।
विश्वस्त छानो भत्किए हैरान उस्तै तिक्तता
भूभाग वैरी ताक्तछन् हाम्रो बचाऔँ अस्मिता।१।

जाज्वल्य आभा छर्दछन् अग्ला हिमाली शृङ्खला
लोभिन्छ आँखा सृष्टिमा दृश्यावली आधारमा।
भूसम्पदाको दाउमा खप्टेर जाली कूटता
भूभाग वैरी ताक्तछन् हाम्रो बचाऔँ अस्मिता।२।

सौन्दर्य लाली दृष्टिमा पोतेर आँखा तर्दछन्
विश्वास राखी शब्दमा मस्तिष्क दाह्रा किट्दछन्।
जाली मिचाहा भित्रिए चैतन्य होला कम्पित
भूभाग वैरी ताक्तछन् हाम्रो बचाऔँ अस्मिता।३।

संस्कार राम्रो सभ्यता आदर्श आर्स्या चेतना
सद्भाव हाम्रो भावमा सर्वोच्चताको मापन ।
आघात पार्ने शक्तिको सातो बनी संवद्धता
भूभाग वैरी ताक्तछन् हाम्रो बचाऔँ अस्मिता। ४।

सामर्थ्य हाँक्ने खेलमा अग्रांश हाबी हो कि त
लोभ्याइ अन्तर्वेगमा चौडा बने वैदेशिक।
उद्दण्ड धावा जोडले नेपाल खाने दाउमा
भूभाग वैरी ताक्तछन् हाम्रो बचाऔँ अस्मिता। ५।

०००
भैरहवा , रूपन्देही