नेपाली हास्यव्यङ्ग्य अनलाइन पत्रिका

सिर्जना खनाल :

फुलेका छन् सेतै काशको चाल केश
पिएका पीडाले प्रीत गाढा विशेष ।
खुलेका हाँसोमा प्रेमगाथा थपी झन्
मिलेका साथी झैँ वृद्धवृद्धा सँगै छन् ।१।

दिने अर्ती गर्छन् मिष्ठ बोली लवाज
यिनैले गर्छन् नै प्रेरणायुक्त राज।
कला पुर्ख्यौलीको हुन्न लाग्ने कता छन्
मिलेका साथी झैँ वृद्धवृद्धा सँगै छन् ।२।

व्यथा बुझ्ने गुन्ने जन्मको सार बोध
भरोसाका बत्ती झल्ल पार्ने सुयोग।
परेवा जोडीको विम्ब साक्षात् यिनै छन्
मिलेका साथी झैँ वृद्धवृद्धा सँगै छन् ।३।

उडे छोराछोरी दूरको देश ताकी
सबै पीडा छोप्दै बस्दछन् देव भाकी।
व्यथा आफ्नो सुन्ने साथले मक्ख पर्छन्
मिलेका साथी झैँ वृद्धवृद्धा सँगै छन् ।४।

बुढ्यौलीको माया प्राणमा प्राण भर्न
निमोठ्दा सुर्ताले शान्तको भाव छर्न ।
परेमा आपत्ती प्रेमले जित्नमै छन्
मिलेका साथी झैँ वृद्धवृद्धा सँगै छन् ।५।

०००
भैरहवा, रूपन्देही