नेपाली हास्यव्यङ्ग्य अनलाइन पत्रिका

‘छोरा, हरेक दिन सूर्योदयसँगै स्नानादि गरी सूर्यलगायत सम्पूणर् इष्टदेवलाई पुकार् । पितृहरूलाई झुकेर श्रद्धाको जल चढा । बाँचुन्जेल मन्त्री भइरहन्छस् ।’ आमाले भनेकी थिइन् रामरतनलाई ।

बाबुले थपेका थिए; ‘लोकको आँखामा बस्ने काम गर् । तँ जनताको आँखाको नानी भइरहन्छस् । तेरो स्थान डगमगाउन कसैले सक्दैन ।’

मन्त्री भएपछि रामरतनले बाबुआमाले भनेको अक्षरशः पालना गर्यो । नियमतः गर्न मिल्ने सबको काम गरिदिन्थ्यो । नमिल्दा कारणसहित मिल्दैन भनेर फर्काइदिन्थ्यो । फलतः उसले आठ महिनामै मन्त्रीपदबाट हात धुनुपर्यो ।

रामरतन दुःखी भएर बसेको बेला छिमेकी भाइले उसको चेत खोलिदियो । उसकै भनाइमा लागेर
उसले बिहानबेलुकै गर्ने इष्टदेव र पितृहरूको पुकार र आराधनामा फेरबदल गर्यो । उनीहरूको स्थानमा आफ्नो दलनिकट शीर्षनेता विराजमान गरायो । इष्टदेव र पितृहरूलाई चढाउने नैवेद्य पनि उच्च गुणस्तरको बनाई शीर्षनेताकै निवासमा पुर्याइरह्यो ।

ऊ दीर्घ मन्त्रीपदकै लागि विवेक बन्धकमा राखेर शीर्षनेताको ‘एस म्यान’ बन्दै गयो ।

सिद्धार्थटोल, उदयपुर । हाल- सिर्जनाकुटी, सिरहा