नेपाली हास्यव्यङ्ग्य अनलाइन पत्रिका

जब जोडिन्छ पैसामा नाता सम्बन्ध हर्दम
उसले भुल्छ आफन्त निणर्य लिन्छ निर्मम ।
पैसापैसा भनी पैसा पैसामै मर्छ मानिस
मर्दा लाँदैन बाँधेर कात्रोमा बिस चालिस ।

नाङ्गै आयौँ सबै नाङ्गै जान्छौँ उँभो निरन्तर
पैसाले नै चिता चढ्छन् भित्रिन्छन् दुलही घर ।
तिरस्कार गरे फेरि चल्दैन काम आखिर
पैसाले नै ठडिन्छन् यी झुक्छन् मानिसका शिर ।

पैसामै दुनियाँ चल्छन् गरीगरी हिसाबमा
पैसाले छोप्दछन् सत्य जित्ने हार्छ निसाफमा ।
राजा रङ्क सबैले नै पैसा पैसा भनेपछि
लफडा हुन्छ पैसामै झुक्याएर गनेपछि ।

भगवान् पनि पैसाकै सपना देख्दछन् अति
गेडी छैन भने टेढा हुन्छन् मायालु श्रीमती ।
छोराछोरी भए पैसा बुबाआमा नि चिन्दछन्
टाउकामा लगी नत्र मसला सम्म पिन्दछन् ।

पैसाले किन्छ मान्छेले कात्रो र दरबार त्यो
पैसा नै मित्र हो साँचो पैसा नै तरबार हो ।
जोखिन्छ रुपियाँसाथ मान्छेको मान इज्जत
पैसाले सक्छ यी मान्छे कुरा छ सर्वसम्मत ।

दमक, झापा