नेपाली हास्यव्यङ्ग्य अनलाइन पत्रिका

विद्या छैन विवेक छैन जसमा ती चाहिँ विद्वान् परे

जाँच्दा न्यून छ बुद्धिअङ्क जसको ती बुद्धिजीवी अरे

घट्दो मान छ माननीय पदको हेर्दा सयौं तस्बिर

खस्केको महिमा महामहिमको छर्लङ्ग ऐनातिर

।१।

तक्मा लिन्छ समाजसेवक भनी चाहन्न सेवा दिन

दर्जा प्राज्ञ हुँदा विवेक अथवा देखिन्न प्रज्ञा किन?

बोक्राभित्र भलादमी छ कुभलो गर्दैछ रातोदिन

लाग्यो छाप अझै वरिष्ठ जसमा पाउन्न निष्ठा किन?

।२।

फक्रेका गुरुमा गुरुत्व गुण खै ? खै शिष्यमा शिष्यता

विद्यावारिधि वारमा वजन खै?खै उच्च उत्कृष्टता ?

छन् नेतृत्वविहीन मार्ग जसका ऊ नै ठुलो नायक

थोपा निर्णयसीप छैन जसमा ऊ बन्छ निर्णायक

।३।

खाँटी स्याल भिरेर हिँड्छ तनमा झन् सिंह छाला कतै

बस्छन् सर्प बनेर उच्च तहमा खैरा गड्यौँला कतै

सानै छन् शिरमा चढेर कतिले जुम्रा बनी डस्दछन्

बिग्रेको अनुहार फेर्न कतिले ऐना पुछी बस्दछन्

।४।

लिन्नन् नीम चिराइतो कलममा लिन्छन् मिठाई मसी

खोज्छन् सर्जक वाहवाह गुटका गुन्द्रीहरूमा बसी

लुट्दैछन् गहना स्वयं मुलुकका निर्लज्ज पालेहरू

बुन्छ्न् जाल अनेक रूप रङका जाली रुमालेहरू

।५।

जन्मस्थल: पञ्चेश्वर-६,बिजुल,बैतडी