नेपाली हास्यव्यङ्ग्य अनलाइन पत्रिका

परशुराम पराशर :

मुसाले अन्नको रक्षा गरोस् भन्ने छ चाहना
बिरालो गोठमा एक्लै बसोस् भन्छन् सबै जना ।
मकै गोड्न गए राम्रो सबै बाँदरका दल
दाइँमा कुखुरा आफैँ किन गर्दै छ अल्मल । १

गोरुले धानका बाला, कोदाका कपनाहरू
टिपेर राख्न थाल्दै छन् बाँकी छन् थपना अरू ।
हुँडारले खसीबाख्रा चराउन् वनमा लगी
गाईगोरु खुबै पालुन् बाघले गोठमा बसी । २

बाख्राले फूलबारीमा गोडमेल गरिरहुन्
बालीको रक्षकी बन्दै भैँसी खुल्ला चरिरहुन् ।
घाँटीमा तुलसी माला लगाई बाघ दौडियुन्
माछाका हुलमा गोही आफन्त सरि पौडियुन् । ३

परेवाका बचेराको सुरक्षा बाजले गरुन्
सर्पलाई परे गारो गरुडै आत्तिई झरुन् ।
जनता नै बनुन् नेता भ्रष्टाचार गरीकन
छुटुन् माला लगाएर जेलनेल परीकन । ४

बेल पाके खुसी होउन् सबै बथान कागका
जोतुन् किसानले खेत, नारी डमरु बाघका
गोठाला देश हाँक्ने हुन् खेताला फैसला गरुन्
नाफाखोर गरुन् सेवा छक्क पर्ने सबै बनुन्। ५

०००
काठमाडाैं