नेपाली हास्यव्यङ्ग्य अनलाइन पत्रिका

प्रतिपक्ष खोज्न कतातिर जाऊँ ?
कतै नजाऊँ, यतातिर आऊँ
प्रतिपक्षको भूमिका व्यङ्ग्यकारको नाउँ ।

उनीहरू सत्ताधारी, हामी कलमधारी
उनका चिल्ला गाडी, हाम्रा छुस्स दाही
कुर्सीमा उनीहरू चारखुट्टे, हामी जहिले पनि दुईखुट्टे
उनीहरू हाम्रो नोट हेर्ने, हामी उनीहरूको खोट हेर्ने

उनीहरू हाम्रा कुरालाई ध्यान पनि दिँदैनन्
हामी उनीहरूलाई लाइन बसेर भोट दिन्छौं
हाम्रै मानो खाएर पनि उनीहरू हाम्रा कुरा गर्दैनन्
हामीहरू आफ्नो मानो खाएर उनीहरूका कुरा गर्छौं

प्रतिपक्षको भूमिकामा हामी व्यङ्ग्यकार
अरू जताततै उज्यालो देख्छन्, हामी अन्धकार
अब यो देश, समाज र सरकार सुधार्ने जिम्मा हाम्रो छ
त्यसैले त अरूको तालीभन्दा हाम्रो गाली राम्रो छ ।

बत्तिसपुतली, काठमाडौं