नेपाली हास्यव्यङ्ग्य अनलाइन पत्रिका

प्रेम ओली ढकलपुरे :

एउटीलाई यसपाली भ्यालेन्टाइन मनाउन बोलाको
तर ती भ्यालेन्टिनाले त यस्तो कलम पो चलाको
प्रिय तिमीसित
भ्यालेन्टाइन मनाउन त आउँछु
तर मेरो एउटा सर्त छ
यो पाली मलाई रोज दिँदा
खाली फूल मात्र हैन
फूलमा मोबाइलको गमला चाहिन्छ
हाम्रो हजुरले जस्तो एक सर्को बिँडीमा
अहिले त कहाँ माया पाइन्छ ?

आफूले त यस्तो प्रेमी बनाउने हो
सात दिन सात रात भ्यालेन्टाइन मनाउने हो
एक दिन बर्गर बियर खाइन्छ
आर्को दिन पिजा र रम लाइन्छ
आफूलाई भ्यालेन्टाइन मनाउन
फूलले मात्र कहाँ हुन्छ र
फूल साथै थरीथरीका कपडा चाहिन्छ
हजुर आमाको जस्तो एक खिल्ली चुरोटमा
यो जमानामा कहाँ माया पाइन्छ ?

आफूले त यो वर्ष सात दिन एउटासँग
भव्य भ्यालेन्टाइम्स मनाउने हो
अर्को वर्ष अर्कै प्रेमी बनाउने हो
त्यो जमाना थ्यो सात दिनलाई हैन
सात जनमलाई मायापिरिम चल्थ्यो
तर यो नयाँ जमाना हो
अब त मायापिरम सात दिनमै ढल्छ
एउटा प्रेमीसित को जीवन भरी चल्छ ?

बरु भन तिमी कति कमाउने गर्छौ
मेरो लागि मरेहत्ते भन्दा नि
भन कति दाम खर्च गर्छौ ?

त्यसैले यो पालीको भ्यालेन्टाइनमा
गुलब फूललाई एउटा सुनको चेन चाहिन्छ
नत्र सित्तैमा यो माया कहाँ पाइन्छ ?

यति खबर पाएपछि उनलाई
मेरी भ्यालेन्टिना बनाइन
यस्तो मन्दीमा कसले खर्च गर्छ ?
बरु भ्यालेन्टाइम्सै मनाइनँ ।

०००
घट्टेकुलो, काठमाडौ