नेपाली हास्यव्यङ्ग्य अनलाइन पत्रिका

माम् खाऊ भन्थिन् आमाले भन्दा दिदीले भात् ख्वाइन्
श्रीमती आइन् सुरु भो भुजा ज्युनार गराइन् ।१।

छिमेकी भेटे भान्सा भो ? भन्थे विदेशी गर्थे लञ्च
नेपाली हामी अभ्यस्त सधैं गकिलो आफ्नै ब्रञ्च ।२।

भोजेले भोज ताकेर बस्थे काट्टो त काट्टेले
तीर्थमा जाँदा कि रोटा खान्थे चावल बाँकीले ।३।

जन्तमा जाँदा बाख्रो नै हुन्थ्यो मठमा भण्डारा
मन्दिर छिर्दा प्रसाद मिल्थ्यो चल्दथ्यो गुजारा ।४।

न शंखघण्ट डमरु बज्छ न होम पर्वमा
पड्किन्छ ताली निभ्दछ बत्ती केकको गर्भमा ।५।

बिर्सियौं आफ्ना संस्कार सबै अर्काको अँगाल्यौं
त्यसैले आजै बुहारी ल्यायौं पिण्ड यो स्वीकार्‍यौं ।६।

घरमा जब बुहारी पसिन् पिण्ड नै पाक्दछ
बखान कति गरुँ म आज सुन्ने नै थाक्दछ ।७।

सीताले पिण्ड पकाएदेखि बसेको थिति यो
म खान्न पिण्ड भनेर डट्ने हिम्मत गर्छ को ? ।८।

ससुरासासू पिण्ड नै खान्थे अगिल्ला पछिल्ला
छिटै नै अब पितृको पिण्ड केकले उछिन्ला ! ।९।

१०।१०।२०७७ (सुत्राधारः चट्याङ मास्टर)