नेपाली हास्यव्यङ्ग्य अनलाइन पत्रिका

नरोऊ आमा
तिमी बिल्कुल नरोऊ
तिमी सहनशीलताकि पर्याय हौ
पृथ्वीकी उपमा, यो आकाश हौ तिमी
तिम्रो आँखामा आँसु सुहाउँदैन, आमा
तिमी रोएको बिल्कुल सुहाउँदैन ।

रुनु भनेको त कम्जोरी हो
आत्मा समर्पण हो, आत्मा जलन हो
आत्मा दहन हो, तिमी रुनु हुँदैन
तिमी रोएको बिल्कुल सुहाउँदैन आमा ।

धेरै रोइसकेकी छौ
युगौँ रोएरै त बिताएकी हौ
भररात बलिन्द्र धारा बगाउँछ्यौ
तिम्रै आँसुले बनेको हो, लाग्छ पानीको भाग ।

तिमी योग माया हौ, आमा
तिमी पारिजात हौ, तिमी पासाङ हौ
तिमी निर्मला अस्मिता र भारती हौ
तिमी क्लारा, तसलिमा, मार्गरेट थ्याचर हौ ।

तिमीसँग सहनशक्तिको अथाह भण्डार छ
तिमीमा सहनशक्तिको लामो इतिहास छ
अनगिन्ती बलिदानी छ क्षमाशीलताको
तिमी सिकाउँथ्यौ, सहनु पर्छ
सहेको कही जाँदैन नानी
त्यही भएर युगौँदेखि अबिराम सहँदै आयौं
सहनसिलता, सहिष्णुता, क्षमाशिलता दान गरिरह्यौ ।

मान्छे थियौ र मानवता सिकायौ
सद्भाव सिकायौ, श्रम सिकायौ
जुन आधारभूत कुरा हुन्
बाँच्नुका पर्याय हुन् ।

कठोरहरू माथि कोमल बन्यौ
सहयोगी बन्यौ, दानी बन्यौ
मातृत्व दियौ, भातृत्व दियौ
र त्यस्तै अपेक्षा गर्‍यौ
तर तिमीप्रतिको हेराइ
हर काल हर समय हर प्रहर उपभोग्य बन्यो
उपभोगको साधनको रुपमै हेरियौ
फोटो पुजियौ, छाया पुजियौ
अहँ, साक्षात देबी तिमी पुजिन सकिनौ, आमा ।

तिमीले फूल दिँदा काडा उपहार पायौ
तिमीले सिकाएका सहनशीलता, मित्रता क्षमशीलता
कोमलता प्रेमको परिणाम हो ,सायद
अठार महिने मेरो बलात्कार र हत्या
सायद तिम्रो अति कोमलता सरलताको
पराकाष्ठा हो मेरो हत्या
तिमीले मलाई सिकाएको “हुँदैन र सक्दिन”को
प्रतिफल हुनसक्छ, मेरो मृत्यु
सधैँ तिमीले सोचे जस्ता दिन नहुँदारहेछन् आमा
अब तिमीले कोमलताभित्रै कठोरता सिकाउनु पर्छ
किनकि मैले तिम्रो आँसुको सागर सुकाउनु छ ।

युगौदेखि तिम्रो आँसुको तालबाट
उठेको जलवास्प हुँ म
उडेकी छु आकाश मार्ग हुँदै मा …थि माथिसम्म
र भेटेकी छु
निर्मला, सुस्मिता, भारतीहरूलाई
अत्याचारले आकाश ढाकेको यस समय
म आउँछु आमा, म आउँछु,
हावा बनेर आउनेछु, आँधी बनेर आउने छु
बर्षाद बनेर आउने छु, म घाम बनेर आउने छु
महामारी बनेर आउने छु
सुनामी, भूकम्प वा ज्वालामुखी बनेर आउनेछु ।

लागेर चर्को घाम सुकाउनेछु तिम्रो आँसुको ताल
चट्याङ बज्रनेछु नरभक्षीहरूका शिरमा
आँधी बनेर उडाउनेछु धर्तीको बिकृत प़mोहोर
बर्षाद बनेर बगाउने छु कुरुप मानसिकता ।

र धर्तीमा राम राज्य बनाउने छु
बुद्धको शान्ति फैलाउने छु
यो माटो धर्तीको भूस्वर्ग बनाउन
म फेरि आउने छु आमा
नरोऊ, म फेरि आउने छु ।

२०७८/१२/०३
बेलबारी, मोरङ ।