नेपाली हास्यव्यङ्ग्य अनलाइन पत्रिका

बिनुबाबा घिमिरे :

सक्कली त हराउँछ बाबु
मलाई त नक्कली चाहिन्छ
सोझासाझाको त काम छैन बाबु
त्यसैले बजारमा अक्कली पाइन्छ
तर मलाई नक्कली चाहिन्छ

आफ्नो भन्दा बरू मलाई
अर्कै देश भए हुन्छ
नागरिकतै बेचीदिन्छु
सबै अन्त गए हुन्छ
यतातिर गाँस हाली
उतैतिर चुठ्न जाउँला
छानबिन भए राती
सीमापारि सुत्न जाउँला

बच्चै छोइ कसम खान्छु
नक्कली नै भए पनि
झट्ट उठी बिदेशिन्छु
मन देशमै रहे पनि

जमानाकै अनुसार
नक्कली नै चाहिंदोरेछ
हल्लाखल्ला चलाउन
बिषै पनि खाइँदोरेछ

तर बाबु,
साथी अक्कली चाहिंदोरेछ
मित्र नक्कली पाइँदोरेछ
चाहिन त बाबु,
जे पनि नक्कली नै चाहिंदोरेछ ।

०००
कलङ्की, काठमाडौं